Što my słuchali ŭ vieraśni — dziesiać najcikaviejšych albomaŭ miesiaca AŬDYJA
Paśla pierapynku, vyklikanaha padziejami ŭ krainie, viartajem tradycyjny ahlad najlepšych, na naš pohlad, muzyčnych relizaŭ miesiaca.
Tricky — Fall to Pieces
Čatyrnaccaty studyjny albom vybitnaha tryp-chop muzyki vypuščany na jaho ŭłasnym łejble. Pa słovach Tricky, «Fall To Pieces» pryśviečany ŭnutranaj baraćbie čałavieka z samim saboj u ciažkija časy. I heta nievypadkova.
U mai 2020 hoda pamierła 24-hadovaja dačka muzyki, jakaja taksama była artystkaj. Paśla trahiedyi Tricky zajaviŭ, što ŭ toj dzień jahony śviet skončyŭsia.
Parov Stelar — Voodoo Sonic The Trilogy, Pt. 3
Aŭstryjski dydžej Markus Fiureder, jaki ŭziaŭ psieŭdanim Parov Stelar, u svajoj tvorčaści vykarystoŭvaje sumieś džazu, chaŭsu, elektra i brejkbitu.
Vašaj uvazie — treciaja častka albomnaj tryłohii, stvoranaja ŭ niepaŭtornym styli z aryhinalnym spałučeńniem muzyčnych žanraŭ.
Hurts — Faith
Paśla vychadu papiaredniaha alboma muzyki adčuvali siabie nastolki vymatanymi, što nie byli ŭpeŭnienyja, što ŭ ich vyjdzie jašče adzin albom.
Ale jany ryzyknuli, i heta akazalisia vartyja taho vysiłki. Pa śćvierdžańni samich Hurts, jany viarnulisia da stylu rańnich albomaŭ i zasumavali pa miełancholii. Sumu i pakut na piatym relizie hurta i napraŭdu dastatkova, ale smutak moža być śvietłym i navat aptymistyčnym.
Marilyn Manson — We Are Chaos
Merylin Mensan nazyvaje płytku svaim «rozdumam ab niaprostych ciapierašnich časach», majučy na ŭvazie ŭsie padziei hetaha hoda.
Jon, jak paet, razvažaje pra chaos, złučajučy ŭ hučańni hłem-, indastryjał- i alternatyŭny mietał. «Ja sprabavaŭ namalavać chaos słovami, a pradziusar — hukami, kab vy mahli bačyć i čuć usiu svaju tuhu i rospač».
ŁSP — Śvinoje Ryło dy One More City
U vieraśni biełaruski hurt ŁSP vypuściŭ adrazu dva albomy. Ź ich relizami vyjšła davoli cikavaja historyja.
11 vieraśnia vyjšaŭ rep-miuzikł «Śvinoje ryła». Pa siužecie padziei alboma adbyvajucca ŭ Śvinskim Sajuzie ŭ časy «pihibudovy». Hałoŭnyja dziejnyja hieroi «kazki» — try dziki: Śvin, Śnif i Snaf. Jany handlujuć žałudami, a potym raptam stanoviacca zorkami. Da ich prychodzić voŭk u pahonach pa mianušcy Brudny Rubiel, jaki strachuje terytoryju — i pačynajecca ekšn.
Fanaty vielmi nieadnaznačna ŭspryniali navinku i pačali budavać zdahadki, što vyjdzie jašče adzin, «sapraŭdny» albom. Sapraŭdy, praz tydzień paśla «Śvinoha ryła» vyjšaŭ albom «One More City».
Télépopmusik — Everybody Breaks the Line
Francuzy Télépopmusik za čverć stahodździa svajoj sceničnaj dziejnaści vypuścili ŭsiaho dva poŭnafarmatnyja albomy i dziasiatak sinhłaŭ, ale zmahli stać šyroka viadomymi i navat kultavymi ŭ elektronnych kołach, zarabiŭšy słavu kłasikaŭ sučasnaha daŭntempa.
U vieraśni pabačyŭ śviet pieršy za 15 hod reliz francuzskich elektronščykaŭ.
Joji — Nectar
Pamiatajecie fłeš-mob Harlem Shake? Jon raspačaŭsia ź videa, na jakim byli čatyry čałavieki, adnaho ź jakich zvali Džordž Miler.
Džordž Miler byŭ videabłohieram, jon zdymaŭ trešovyja roliki, jakija nabirali šalonuju kolkaść prahladaŭ. Ale Joji zakinuŭ karjeru błohiera i zaniaŭsia muzykaj. Siońnia my viedajem jaho jak adnaho z najbolš papularnych R&B-vykanaŭcaŭ.
Idles — Ultra Mono
Treci albom pankaŭ z Brystala, u jakim jany praciahvajuć razvažać pra stanoŭčy i admoŭny baki pośpiechu, a taksama pra sacyjalnyja prablemy siońniašniaha hramadstva.
Krytyki nakolki pa-roznamu staviacca da samoha hurta, nastolki i padzialilisia vodhuki pra reliz. Ale ŭsie schodziacca ŭ adnym — enierhija Idles nikudy nie padziełasia.
Deftones — Ohms
U adroźnieńnie ad papiaredniaha relizu, u dačynieńni da novaha alboma kultavych Deftones usie syšlisia ŭ adzinym mierkavańni — heta adzin z najlepšych albomaŭ hoda. Na mietał-scenie, mahčyma, i prosta najlepšy.
Možna pa-roznamu stavicca da Deftones, ale lepš za ich naŭrad ci niechta moh by praśpiavać i syhrać pra 2020 hod.
A što słuchali vy? Pišycie ŭ kamientarach.
