Siońnia adkryvajecca samit ES: buduć abmiarkoŭvać Biełaruś, Navalnaha i Nahorny Karabach
Jeŭrapiejskaja rada na svaim pasiadžeńni ŭ Bruseli 1-2 kastryčnika siarod inšych pytańniaŭ paradku dnia abmiarkuje situacyju ŭ Biełarusi, mierkavanaje atručvańnie rasijskaha apazicyjaniera Alaksieja Navalnaha i Nahorna-karabachski kanflikt, piša «Interfaks».
«U kancy pasiadžeńnia (1 kastryčnika) my abmiarkujem biahučyja pytańni, jakija patrabujuć našaj uvahi, a mienavita: situacyju ŭ Biełarusi, atručeńnie Alaksieja Navalnaha i Nahorna-karabachskuju eskałacyju», — napisaŭ staršynia Jeŭrapiejskaj rady Šarl Mišel kiraŭnikam dziaržaŭ i ŭradaŭ krain JEZ u liście-zaprašeńni na samit Jeŭraźviaza.
Kamientujučy žurnalistam napiaredadni sustrečy ŭ viarchach Jeŭrasajuza raździeły paradku dnia, vysokapastaŭleny čynoŭnik ES, jaki vystupaŭ na ŭmovie ananimnaści, adznačyŭ, što ŭ samitu «dźvie ambicyi — dalejšaje raźvićcio ekanomiki i rynku i źniešnija adnosiny».
«Samymi važnymi punktami (mižnarodnaj častki paradku sustrečy) źjaŭlajucca Biełaruś, Nahorny Karabach, Turcyja, a taksama Kitaj i atručeńnie Navalnaha», — paviedamiŭ surazmoŭca ŚMI.
Havoračy pra biełaruskuju situacyju, jon adznačyŭ, što budzie abmiarkoŭvacca «stan spraŭ z sankcyjami pa Biełarusi i suviaź, jakuju pravodziać niekatoryja delehacyi z Turcyjaj», nie nazvaŭšy pry hetym Kipra, jaki błakuje praceduru hetych sankcyj.
