U Minsku projdzie «Teart» — upieršyniu biez Babaryki
U Minsku pakažuć śpiektakli Kšyštafa Varlikoŭskaha, Ałvisa Chiermanisa i Cimafieja Kulabina, a taksama najlepšyja biełaruskija pastanoŭki — mižnarodny forum teatralnaha mastactva «Teart», jaki adkryvajecca 2 kastryčnika, abviaściŭ prahramu. Budzie pakazana dvaccać dzieviać śpiektaklaŭ. Praz epidemijałahičnuju situacyju «Teart» nie zmoh zaprasić u Minsk haściej, tamu mižnarodnaja prahrama budzie demanstravacca ŭ zapisie na vialikim ekranie.
Sioleta «Teart» projdzie ŭžo ŭ dziasiaty raz: u svoj čas forum, jaki možna ličyć adnoj z hałoŭnych teatralnych padziej hoda, staŭ raźvivacca dziakujučy padtrymcy «Biełhazprambanka» i asabista Viktara Babaryki. Kožny hod tady jašče bankir, a ciapier palitviazień nabyvaŭ kvitki ŭ pieršy šerah i prychodziŭ na pastanoŭki razam z žonkaj, kali taja była žyvaja, i synam Eduardam Babarykam, taksama ciapier palitviaźniem.
Dziasiaty teatralny forum pa-raniejšamu padtrymlivaje «Biełhazprambank». U kulturnaj supolnaści da apošniaha łunała pytańnie, ci budzie «Teart» arhanizavany ŭvohule, ale na minułym tydni dyrekcyja abviaściła: forum adbudziecca, niahledziačy ni na što.
Praŭda, pandemija karanavirusa nie dazvoliła joj paŭnavartasna padrychtavać samuju čakanuju prahramu — mižnarodnuju, i vymusiła pieravieści jaje ŭ farmat pakazaŭ u zapisie. Zrešty, taki varyjant dla teatrałaŭ nie novy: pastanoŭki zamiežnych teatraŭ rehularna pakazvajucca ŭ minskich kinazałach u prajekcie «TheatreHD», da taho ž pandemija nadoŭha pieraviała hledačoŭ na prahlady na kanapie.
Takim čynam, mižnarodnaja prahrama pakaža vasiamnaccać śpiektaklaŭ, paśla častki ź ich buduć arhanizavanyja razmovy z pastanovačnymi kamandami. U siekcyju ŭvajšli raboty režysioraŭ Ałvisa Chiermanisa, Oskarasa Karšunovasa, Hžehaža Jažyny i Kšyštafa Varlikoŭskaha. Asobnaj častkaj prahramy buduć pakazy «najlepšych rasijskich śpiektaklaŭ», siarod jakich pastanoŭki Cimafieja Kulabina, Kanstancina Bahamołava dy inšych.
Asobnaj vartaściu «Tearta» ličycca prafiesijny adbor najiarčejšych biełaruskich pastanovak minułaha siezona — takim čynam forum pakazvaje, što adbyvajecca ŭ našym teatralnym pracesie i jak u krainie raźvivajecca teatralnaje mastactva. Sioleta ŭ padborku Belarus Open uvajšło adzinaccać śpiektaklaŭ — jak raboty repiertuarnych teatraŭ, tak i niezaležnyja prajekty. Siarod apošnich, darečy, adrazu try ŭdzielniki ad centra vizualnych i vykanalnickich mastactvaŭ «Art Karparejšn», jaki arhanizuje «Teart». U biełaruskuju siekcyju adborščyki ŭklučyli raboty Jaŭhiena Karniaha, Kaciaryny Avierkavaj, Alaksandra Marčanki, Alaksieja Lalaŭskaha, Ihara Kazakova dy inšych.
Aproč dvuch prahram pakazaŭ forum arhanizuje adukacyjnuju płatformu «Škoła «Tearta», što praduhledžvaje tvorčuju łabaratoryju, lekcyi i sieminary — sioleta jana projdzie pad słohanam «Teatr u časy ŭzrušeńniaŭ».
Mierapryjemstvy «Tearta» buduć prachodzić da 24 kastryčnika.
