Budkin aburany zakryćciom prahramy na «Biełsacie»: My hieroi, a z nami pa-skocku. Kiraŭnictva: Biudžet nie humavy
Muzyčny pradziusar i viadučy Siarhiej Budkin napisaŭ u fejsbuku poŭny rospačy dopis ab tym, što telekanał «Biełsat» zakryvaje pieradaču Belsat Music Live. Prahrama vychodziła ŭ efir ad pačatku 2017 hoda, była zaćvierdžanaja i na novy siezon, jaki pačynajecca ŭ vieraśni.
Siarhiej Budkin, fota Nadziei Bužan
«Mianie i maju kamandu, jakaja robić Belsat Music Live, kinuli! — emacyjna pačynaje post Budkin. — 19 vieraśnia pavinna vyjści pieršaja ŭ novym siezonie prahrama z etna-trya «Troica», jakuju my źniali na ruinach chrama ŭ Bierazaŭcy pad Kareličami. Mahčyma, jana stanie apošniaj u historyi BML. Rašeńnie pra zakryćcio našaj prahramy było raptoŭna pryniataje naprykancy žniŭnia ŭ toj momant, kali ŭžo byŭ zapuščany praces vytvorčaści niekalkich prahramaŭ.
Niahledziačy na raniej dasiahnutuju damoŭlenaść na zapusk siezona i na toje, što prahrama ŭžo była zapłanavanaja ŭ sietcy viaščańnia. Biez tłumačeńniaŭ i vybačeńniaŭ. Dyrektarka kanała, jakaja adnaasobna pryniała hetaje rašeńnie, z nami razmaŭlać nie pažadała, prasiła pieradać praz trecich asobaŭ, što nie budzie čuć nijakich arhumientaŭ. Na majo telefanavańnie jana adkazała, što ničoha nie viedaje, a paźniej napisała, što «niama takoha prava čałavieka, jak pradukcyja prahramy na «Biełsacie» i što zvanki i skandały nie dapamohuć».
«Na kampramisnuju prapanovu, ahučanuju 28 žniŭnia, zachavać prahramu z vychadam 1 raz na miesiac ja adkazu dahetul nie atrymaŭ», — adznačaje Budkin. Jon adznačaje, što vyrašyć pytańnie kułuarna nie atrymałasia, tamu vyrašyŭ napisać post.
Dyrektarka «Biełsata» Ahnieška Ramašeŭskaja piśmova patłumačyła dla «Našaj Nivy» pazicyju telekanała: «U suviazi z padziejami hetaha leta (mabyć, majucca na ŭvazie prezidenckija vybary i pratesty paśla ich — NN) i nieabchodnaściu pradastaŭleńnia srodkaŭ na žurnalisckuju infarmacyjnuju słužbu biahučych padziej, my byli vymušany ŭnieści źmieny ŭ vosieński hrafik viaščańnia. Niekalki pieryjadyčnych prahram byli prypynienyja albo spynienyja, niekatoryja ź ich buduć pieraroblenyja. My pavialičyli srodki na inšyja prahramy, jakija ŭ ciapierašni čas asabliva cikaviać ludziej. Na žal, biudžet nie humavy».
Tym nie mienš Ramašeŭskaja śćviardžaje, što «Biełsat» pa-raniejšamu adkryty dla supracy ź biełaruskimi muzykami: «My prapanavali Siarhieju Budkinu padrychtavać klipy dla peŭnych artystaŭ i vykanać inšyja zadačy, naprykład, padrychtavać navahodni kancert i šou. Na žal, jak ja baču, jon ich nie pryniaŭ, i jaho sposab zajmacca prafiesijnymi pytańniami, miakka kažučy, niezvyčajny», — adznačaje dyrektarka «Biełsata».
Sam Siarhiej Budkin kaža, što spyniaje supracoŭnictva z kanałam.
«Prapanovu, pieradadzienuju praz trecich asobaŭ, ja nie mahu ŭsprymać surjozna i liču jaje sprobaj syści ad adkaznaści. Maju prahramu, niehladziačy na damoŭlenaść, skasavali, kali było zroblena 50% pracy.
Liču, što dalejšy dyjałoh mahčymy, tolki kali mnie i majoj kamandzie buduć pryniesienyja vybačeńni za takoje staŭleńnie da tych, chto farmavaŭ imidž kanała ciaham piaci hod», — skazaŭ pradziusar u kamientary «NN».
Siarhiej Budkin na zdymkach pieradačy. Fota z facebook.com
Belsat Music Live — heta pieradača, u jakuju štotydzień zaprašaŭsia niechta ź biełaruskich muzykaŭ. Rabiłasia hutarka sa śpievakami, a paśla muzyki vykonvali svaje chity.
U vytvorčaści prahramy prymali ŭdzieł kala 20 čałaviek. Praz BML prajšli bolš za sotniu muzykaŭ.
Stvaralniki pieradačy kažuć, što rabili jaje za nievialikija hrošy, našmat mienšyja, čym anałahičnyja šou u Rasii ci Ukrainie. Kankretnuju sumu nie nazyvajuć. Kažuć, što dla ekanomii zdymali błokami pa 6-7 pieradač. Heta zajmała pa dva dni ź nievialikimi pierapynkami na son.
«My hieroi, a z nami pa-skocku», — padsumoŭvaje Siarhiej Budkin.