Navukoŭcy roznych krain: Kalektyŭnaha imunitetu niama, z karanavirusam pryjdziecca žyć da stvareńnia vakcyny
Rost kolkaści pierachvarełych na karanavirus nie spynić pandemiju. U Niamieččynie i Paŭdniovaj Karei paśla najnoŭšych daśledavańniaŭ antyciełaŭ pachavali papularnuju kancepcyju baraćby z SARS-CoV-2, piša dw.com.
«Kancepcyju kalektyŭnaha imunitetu možna ličyć pravalenaj». «Vypracavać u hramadstvie papulacyjny imunitet de-fakta niemahčyma». Hetyja amal identyčnyja zajavy prahučali z vusnaŭ palitykaŭ adnačasova ŭ Hiermanii i Paŭdniovaj Karei. Kateharyčnaść vykazvańniaŭ śviedčyć ab tym, što ŭ dźviuch krainach, dzie da hetaha času bolš paśpiachova zmahalisia z karanavirusam, adbyłasia istotnaja pieraacenka mietadaŭ baraćby z pandemijaj i šancaŭ na pośpiech.
Praŭda, u Bierlinie i ŭ Sieule ad samaha pačatku nie rabili staŭku na chutkuju vypracoŭku kalektyŭnaha imunitetu da COVID-19 dziakujučy vialikaj kolkaści pierachvarełych. Hetaj kancepcyi adzin čas trymalisia ŭ Łondanie i ŭ peŭnaj miery ŭ Stakholmie. Ale mahčymaść uźniknieńnia masavaj nieŭsprymalnaści da infiekcyi pa miery jaje pašyreńnia i nie vyklučali. Adhałoskam takoha padychodu stała, da prykładu, našumiełaja fraza kanclera FRH Anhieły Mierkiel, jakaja zajaviła ŭ siaredzinie sakavika sa spasyłkaj na epidemijołahaŭ, što zarazicca mohuć da 70 adsotkaŭ nasielnictva.
Ale tady navuka jašče vielmi mała viedała pra asablivaści novaha padstupnaha virusa. Viedy hetyja rastuć litaralna z kožnym tydniem, i ŭ samy apošni čas množacca prykmiety taho, što ŭ infikavanych SARS-CoV-2 nie vypracoŭvaŭsia praciahły imunitet. Inšymi słovami, jany ryzykujuć, što buduć zaražacca znoŭ i znoŭ.
Tak, navukoŭcy łondanskaha King's College, jakija z sakavika pa červień nazirali za bolš jak 90 pacyjentami, vyśvietlili, što kancentracyja antyciełaŭ u kryvi infikavanych dasiahała maksimumu praz try tydni paśla źjaŭleńnia pieršych simptomaŭ zachvorvańnia, a zatym chutka — navat imkliva — padała. Na piku zachvorvańnia kala 60 adsotkaŭ demanstravali mocny imunny adkaz, praz try miesiacy jaho vyjavili tolki ŭ 17 adsotkaŭ.
Karł Łaŭterbach: pierachvarełyja na COVID-19 traplajuć u hrupu ryzyki
Mienavita heta daśledavańnie zaachvociła niamieckaha palityka Karła Łaŭterbacha abviaścić 13 lipienia ŭ Twitter faktyčny krach kancepcyi kalektyŭnaha imunitetu. Jaho zajavu pracytavali mnohija niamieckija ŚMI, pakolki były doktar, jaki ličyŭsia kandydatam na pasadu ministra achovy zdaroŭja, źjaŭlajecca viadučym ekśpiertam pa miedycynskich pytańniach parłamienckaj frakcyi sacyjał-demakratyčnaj partyi Hiermanii (SDPH), a jana ŭvachodzić u kirujučuju ŭ FRH uradavuju kaalicyju.
Na dumku Łaŭterbacha, vysnovy brytanskich navukoŭcaŭ «nie aznačajuć, što praź niekalki miesiacaŭ niama ŭžo naohuł nijakaha imunitetu, ale jon, vierahodna, budzie chutčej niapoŭnym». Tamu jość niebiaśpieka paŭtornych zaražeńniaŭ, «pryčym uskładnieńni paśla pieršaj infiekcyi mohuć pahoršyć chadu druhoj. Tak što toj, chto adzin raz pierachvareŭ, traplaje ŭ hrupu ryzyki», — papiaredziŭ ekśpiert. A heta ŭžo poŭnaja supraćlehłaść kalektyŭnamu imunitetu.
Karł Łaŭterbach adhuknuŭsia na publikacyju mienavita brytanskich navukoŭcaŭ, ale jon moh spasłacca i na nazirańni daktaroŭ Miunchienskaj kliniki Švabinh, u jakoj u studzieni lačylisia, a z tych časoŭ nazirajucca pieršyja ŭ Hiermanii pacyjenty z karanavirusam.
«Padčas śpiecyjalnaha testu, praviadzieńnie jakoha mahčyma tolki ŭ łabaratoryi z padvyšanymi ŭmovami biaśpieki, my nazirali źnižeńnie kolkaści tak zvanych niejtralizujučych antyciełaŭ u čatyroch ź dzieviaci pacyjentaŭ», — raspavioŭ hałoŭny doktar adździaleńnia infiekcyjnych zachvorvańniaŭ kliniki Klemiens Viendnier.
Antycieły ŭ kryvi žycharoŭ Paŭdniovaj Karei nie vyjaŭlenyja
Kali ŭ Niamieččynie kancepcyju kalektyŭnaha imunitetu pakul publična pachavaŭ chaj i vielmi aŭtarytetny, ale ŭsio ž asobny palityk, to ŭ Paŭdniovaj Karei, dzie ŭžo nie raz fiksavali paŭtornyja zaražeńni, heta zrabili na aficyjnym uradavym uzroŭni. 12 lipienia na pres-kanfierencyi ŭ Sieule ministr achovy zdaroŭja Pak Nyn Chu abviaściŭ, što vypracavać u paŭdniovakarejskim hramadstvie papulacyjny imunitet de-fakta niemahčyma.
Jon spasłaŭsia na daśledavańnie, u jakim udzielničali 3055 žycharoŭ krainy, a antycieły navukoŭcy vyjavili tolki ŭ adnaho. Ministr zrabiŭ z hetaha vysnovu, što raźličvać na źjaŭleńnie kalektyŭnaha imunitetu pry vypracoŭcy stratehii baraćby z karanavirusam biessensoŭna. Zamiest hetaha varta raźličvać na toje, što pandemija COVID-19 praciahniecca jašče hod-dva, da stvareńnia efiektyŭnaj vakcyny.
Uvieś hety čas pryjdziecca pastajanna strymlivać pašyreńnie infiekcyi, papiaredziŭ Pak Nyn Chu. Tamu hramadstvu nieabchodna dasiahnuć harmaničnaha bałansu pamiž paŭsiadzionnym žyćciom i supraćepidemičnymi mierami i pryznać, što suisnavańnie ź virusam — heta ciapier novaja forma, novaja kultura hramadskaha žyćcia.
«Niebiaśpiečnaja kancepcyja papulacyjnaha imunitetu»
Karł Łaŭterbach taksama čakaje źjaŭleńnia efiektyŭnaj vakcyny, ale dapuskaje, što jaje dziejańnie budzie niedaŭhaviečnym. U takim razie, miarkuje jon, pryjdziecca rehularna rabić pryščepki. Hetaha nie vyklučaje i Keci Durs, viadučy aŭtar daśledavańnia King's College.
Ale pakul vakcyny niama, klučavoje značeńnie, padkreślivaje Karł Łaŭterbach, nabyvajuć miery pa praduchileńni infiekcyj, u tym liku siarod maładych ludziej. Ich los turbuje i virusołaha z Kiembrydžskaha ŭniviersiteta Džonatana Chini.
Častka žycharoŭ Vialikabrytanii, asabliva moładź, «lehkadumna zaraziłasia, pakolki ličyła, što spryjaje tym samym farmiravańniu papulacyjnaha imunitetu», — pieražyvaje navukoviec. «Ja nie stamlajusia paŭtarać, — cytuje Chini vydańnie Business Insider, — što ničoha dobraha ŭ tym, kab zarazicca hetym virusam, niama». Daśledavańnie King's College Džonatan Chini nazyvaje «jašče adnym ćvikom u trunu niebiaśpiečnaj kancepcyi papulacyjnaha imunitetu».
