Palitviaźni-2020. Chto taki apieratar Viarhilij Ušak, jaki staŭ vypadkovaj achviaraj pravakacyi ŭ Hrodnie?
Kali pahartać sacsietki 26-hadovaha Viarhilija Ušaka, to bačyš staronki zvyčajnaha maładoha čałavieka «z pretenzijaj na tvorčaść». Šmat fotasiesij, pryhožyja dziaŭčyny, pafasnyja pastanovačnyja partrety samoha Vierhilija, trošački hrafamanii… Nijakaj sacyjalnaj ci hramadzianskaj aktyŭnaści i tym bolš palityki.
Ale ŭ kancy maja Viarhilij vyrašyŭ pasprabavać siabie ŭ videa i adhuknuŭsia na abjavu błohiera Siarhieja Cichanoŭskaha, jaki šukaŭ apieratara dla zdymkaŭ na pikiecie ŭ Hrodnie. Z hetaha dnia los Ušaka kardynalna źmianiŭsia. Palityka sama ŭvajšła ŭ jaho žyćcio i žyćcio jaho blizkich. Razam ź joj uvajšli siłaviki, zatrymańni, vobšuki, kraty Vaładarki… A taksama artykuły 342 i 364 Kryminalnaha kodeksa, pa jakich Viarhiliju ciapier pahražaje da 6 hadoŭ kałonii.
Byŭ Alaksandram, staŭ Viarhilijem
Chłopiec naradziŭsia i vyras u Vierchniadźvinsku. Baćki nazvali jaho Alaksandram. Jon z samaj zvyčajnaj siamji: baćka pracuje mastakom u spažyŭkaapieracyi, vyrablaje rekłamu.
«Ja raściŭ jaho faktyčna sam. Syn skančvaŭ škołu, byŭ užo darosłym, kali my razvodzilisia z žonkaj. Vyrašyŭ sam zastacca sa mnoj, — raskazaŭ «Našaj Nivie» Uładzimir Ušak, baćka chłopca. — Syn nie byŭ chulihanam, vučyŭsia siarednie, ale narmalna. Dumaŭ stać prahramistam. Paśla škoły pastupiŭ u połacki technikum. Atrymaŭ siaredniuju śpiecyjalnuju adukacyju, advučyŭsia na prahramista. Paśla paru hadoŭ papracavaŭ pa śpiecyjalnaści ŭ nas u Vierchniadźvinsku, taksama ŭ spažyŭkaapieracyi. Ale tut maleńki horad, pierśpiektyŭ niama. Nu i syn vyrašyŭ, što treba niešta mianiać. Sabraŭsia i pajechaŭ u Minsk».
Akramia taho, Saša Ušak vyrašyŭ źmianić imia. Źmianiŭ «Alaksandr» na pryhožaje rymskaje imia «Viarhilij». Čamu — tajamnica. Baćka adkazvaje koratka: «Heta vielmi pryvatnaja historyja».
U Minsku ŭžo Viarhilij Ušak doŭha šukaŭ pracu. Sprabavaŭ siabie ŭ madelnym biznesie, naviedvaŭ Nacyjanalnuju škołu pryhažości, rabiŭ fotazdymki sam, udzielničaŭ u zdymkach jak madel.
«Hrošy heta prynosiła jak kali. Spačatku było pracaj, ale paśla pierarasło ŭ takoje tvorčaje chobi», — kažuć znajomyja Viarhilija.
U vyniku Ušak znajšoŭ stałuju pracu pa śpiecyjalnaści. Jon uładkavaŭsia apierataram EVM u Śviata-Jelisaviecinski manastyr. Pracavaŭ tam apošnija dva hady.
«Zarobku jamu na žyćcio chapała. Ale kab vyjšła «pa 500», davodziłasia padpracoŭvać», — kažuć znajomyja chłopca.
Žyŭ Viarhilij ścipła: zdymaŭ pakoj razam sa svajoj niaviestaj Nadziejaj Sałodkaj.
Prapanovu ruki i serca zrabiŭ praz 3 miesiacy
Nadziei 24 hady. Jana mieniedžar pa prodažach u adnoj sa staličnych pryvatnych kampanij.
Nadzieja Sałodkaja, fota Iryny Arachoŭskaj, Biełsat
«Naša Niva» źviazałasia z Nadziejaj, ale jana admoviłasia ad kamientaroŭ.
Viadoma, što para paznajomiłasia vypadkova: Nadzieja jechała ź Minska ŭ Połack, adkul jana rodam. Vyrašyła skarystacca błabłakaram, i tak atrymałasia, što ŭ mašynie byŭ druhi pasažyr — Viarhilij, jaki taksama jechaŭ da svaich baćkoŭ. Jany razhavarylisia — i nieŭzabavie zaviazalisia stasunki.
Raman byŭ imklivym, navat prapanovu ruki i serca Viarhilij zrabiŭ chutka, užo praz try miesiacy znajomstva.
Zatym para źjechałasia. Raśpisacca płanavali sioleta, 20 maja, ale praz karanavirus viasielle pryjšłosia adkłaści na nieviadomy termin. A ŭ kancy maja zamiest śviata i miadovaha miesiaca Nadzieju i Viarhilija čakali zusim inšyja emocyi: 29 maja ŭ Hrodnie Ušaka zatrymali siłaviki.
Vypadkovaja achviara
Paralelna z pracaj Ušak praciahvaŭ aktyŭna zajmacca fatahrafijaj. Jon zdymaŭ i zdymaŭsia sam. A apošnim časam vyrašyŭ pasprabać siabie ŭ zdymkach videa.
Nadzieja raskazvała ŭ intervju «Biełsatu», što Viarhilij zaŭsiody byŭ apalityčnym. Nijakaj hramadzianskaj aktyŭnaści nie prajaŭlaŭ, u pikietach nie ŭdzielničaŭ. A ŭ apieratary da Cichanoŭskaha trapiŭ prosta tamu, što vyrašyŭ pasprabavać zaniacca videazdymkami.
«Jon adhuknuŭsia na abjavu pra pošuk apieratara dla zdymki na pikiecie mienavita ŭ Horadni. Taja piatnica ŭ jaho była volnym dniom, tamu jon pajechaŭ u Horadniu, kab pazdymać, — raskazvała dziaŭčyna. — Nijakich hrošaŭ jamu dakładna nie prapanoŭvali. Nu voś prosta jamu čamuści zachaciełasia… Nie viedaju čamu. Jon mnie padrabiaznaści nie tłumačyŭ».
Viarhilij zdymaŭ nie ŭvieś pikiet, a tolki apošnija hadziny, da hetaha pracavaŭ inšy apieratar. Čym skončyŭsia jaho pieršy apieratarski vopyt viadoma: Ušaka zatrymali razam ź Cichanoŭskim i inšymi členami kamandy błohiera.
Nadzieja nazirała zatrymańnie svajho žanicha faktyčna ŭ žyvym efiry.
«Ja adrazu zrazumieła, što jon nievinavaty, bo tam vyrazna vidać na videa, što jon znachodzicca ad toj šturchaniny na adlehłaści 1,5-2 mietra», — raskazvała dziaŭčyna.
Ušak — u karyčnievaj kurtcy, vydzieleny koleram. Fota — «Biełsat»
Paśla ŭsie vychodnyja jana nie viedała, što ź Viarhilijam i dzie jon. Tolki ŭ paniadziełak ź joju źviazaŭsia dziažurny advakat, jaki paviedamiŭ: Ušak pad vartaj, jon u izalatary.
Paśla ŭ minskim pakoi Nadziei i Viarhilija prajšoŭ vobšuk.
Pieršyja niekalki dzion Ušak haładaŭ u znak pratestu suprać svajho zatrymańnia, ale praz try dni znoŭ pačaŭ jeści.
Ciapier Viarhilij znachodzicca ŭ SIZA na Vaładarcy. Ź niaviestaj i baćkami stasujecca praź listy.
Ušak, jak i Cichanoŭski z kamandaj, fihurant dźviuch kryminalnych spraŭ. Pa artykule 342 KK (Arhanizacyja i padrychtoŭka dziejańniaŭ, jakija hruba parušajuć hramadski paradak) Viarhilij prachodzić jak abvinavačany. Pa hetym artykule jamu pahražaje da 3 hadoŭ pazbaŭleńnia voli. Pa artykule 364 KK (Hvałt albo pahroza hvałtu ŭ dačynieńni da milicyi) Ušak pakul što prachodzić jak padazravany. Kali jon stanie abvinavačanym, pakarańnie budzie suvorym — artykuł praduhledžvaje da 6 hadoŭ kałonii.
«Ja liču, što vychavaŭ dobraha syna. Prablem ź milicyjaj, narkotykami nikoli nie było. Jon nie pje, nie kuryć.
I ŭ tym, što jon ciapier pad vartaj, vinavataja milicyja — jasna ž, što heta była pravakacyja, — kaža Uładzimir Ušak. — Sam ja apalityčny čałaviek, bo tut u nas horad maleńki — kali što, adrazu z pracy vyhaniać. I chto taki Cichanoŭski, ja daviedaŭsia tolki kali syna aryštavali. Ale ja pahladzieŭ šmat rolikaŭ z taho pikieta — vidać, što Viarhilij ničoha kiepskaha nie rabiŭ, tolki zdymaŭ videa.
Ja napisaŭ list synu ŭ SIZA, babula napisała, ale adkazu pakul niama. Baimsia, moža, jon našy listy prosta nie atrymaŭ?
Čaho čakać dalej — nie viedaju. Ja dumaju, što pakul vybary nie projduć, ničoha nie źmienicca, a tam vidać budzie. Spadziajusia, moža, syna paśla vybaraŭ usio ž adpuściać. Jon ža ni ŭ čym nie vinavaty.
Chacia voś byŭ sud u Hrodnie, Viarhiliju dali 7 sutak. Za što?
Videa, aŭdyja — ničoha nie hladzieli i nie słuchali. Prosta asudzili i ŭsio».
«Razmachvaŭ rukami, maciukaŭsia»
2 lipienia ŭ Hrodnie sapraŭdy prajšoŭ sud nad Viarhilijem Ušakom.
Chłopca pryznali vinavatym u niepadparadkavańni milicyi i drobnym chulihanstvie.
Sam Ušak na sudzie prysutničaŭ virtualna — jaho nie pryvozili ŭ Hrodna, arhanizavali tranślacyju z Vaładarki.
«Śviedkami vystupili supracoŭniki AMAPa Pavieł Konan, Dzianis Sierada, milicyjant Siarhiej Rymko, — paviedamlaje tut.by. — Zhodna z pratakołam, 29 maja na vybarčym pikiecie na Savieckaj płoščy ŭ Hrodnie Ušak łajaŭsia niecenzurnaj łajankaj, čaplaŭsia da hramadzian, parušaŭ hramadski paradak, pry zatrymańni akazaŭ niepadparadkavańnie milicyi, upiraŭsia».
Viarhilij svaju vinu nie pryznaŭ. Jon raspavioŭ, što ŭ toj dzień vioŭ žyvuju tranślacyju ź pikieta. Nikomu nie zadavaŭ pytańniaŭ, rukami nie razmachvaŭ, bo trymaŭ štatyŭ z mabilnym telefonam. Kali jaho schapili nieviadomyja, štatyŭ z telefonam vypaŭ u jaho z ruk. Pa słovach Ušakoŭ, jon padniaŭ ruki i spakojna prajšoŭ za tymi, chto jaho zatrymlivaŭ, niepadparadkavańnia nie akazvaŭ.
Ale ž śviedka-milicyjant Konan raspavioŭ, što pryjšoŭ na Savieckuju płošču, kali pastupiŭ sihnał ab hvałcie ŭ dačynieńni da supracoŭnika milicyi. Pa słovach amapaŭca, jon ubačyŭ Ušaka, jaki maciukaŭsia, čaplaŭsia da ludziej, tykaŭ im amal u tvar štatyvam z mabilnym telefonam. Kali jaho zatrymlivali, to Ušak spačatku išoŭ spakojna, a pry pasadcy ŭ mašynu nibyta akazaŭ niepadparadkavańnie, upiraŭsia, čaplaŭsia rukami za formu…
Prykładna toje ž raspaviali i inšyja śviedki-milicyjanty. Vynik pradkazalny — Viarhilija pryznali vinavatym i asudzili na 7 sutak.
***
Biełaruskija pravaaboroncy pryznali Viarhilija Ušaka palitviaźniem. Kab padtrymać jaho, vy možacie nakiravać list pa adrasie: SIZA-1, vuł. Vaładarskaha, 2, h. Minsk, 220050. Ušaku Viarhiliju Uładzimiraviču.