Navukoŭcy daviedalisia, jak chutka dziejničaje bieśsimptomnaja pieradača karanavirusa
Italjanskija i brytanskija miedyki vyvučyli, jak karanavirus novaha typu raspaŭsiudžvaŭsia ŭ kamunie Vo — adnym ź pieršych centraŭ epidemii COVID-19 u Italii. Vyjaviłasia, što bolš za 40% zaražeńniaŭ na jaho terytoryi byli ad bieśsimptomnych nośbitaŭ virusa i, kali b nie karancin, COVID-19 zajmieli b 86% žycharoŭ. Pa fakcie ž zarazilisia ŭsiaho 5%. Ich vysnovy apublikavaŭ navukovy časopis «Nature».
«My praviali dva abśledavańni, u jakich udzielničali 81% i 72% žycharoŭ kamuny Vo. Akazałasia, što 42% paćvierdžanych vypadkaŭ karanavirusnaj infiekcyi prachodzili bieśsimptomna. Heta adpaviadaje vynikam mnohich inšych daśledavańniaŭ i tearetyčnym acenkam», — pišuć navukoŭcy.
U kancy studzienia kiraŭnik Dziaržaŭnaha ŭpraŭleńnia achovy zdaroŭja KNR Siaavej Ma paviedamiŭ, što karanavirus SARS-CoV-2 moža pieradavacca ad čałavieka da čałavieka jašče da źjaŭleńnia pieršych simptomaŭ chvaroby. Paźniej da anałahičnaj vysnovy pryjšli epidemijołahi ź Japonii i inšych krain.
Spačatku navukoŭcy pastavilisia da padobnych zajavaŭ skieptyčna. Adnak nazirańni paćvierdzili, što virus moža tak pieradavacca. Tamu daśledčyki pačali vyvučać i asimptamatyčnuju pieradaču virusa i aceńvać, jak časta heta adbyvajecca.
Hrupa italjanskich i brytanskich miedykaŭ pad kiraŭnictvam prafiesara Impierskaha kaledža Łondana (Vialikabrytanija) Andrea Kryzanci praviała adno z samych maštabnych i ŭsiebakovych daśledavańniaŭ takoha rodu. Jana vyvučała dadzienyja i ŭzory bijamateryjału, jakija italjanskija miedyki źbirali ŭ lutym i sakaviku hetaha hoda na terytoryi kamuny Vo.
Hety «sielsaviet» raźmiaščajecca niedaloka ad Vieniecyi. U kancy lutaha hetaha hoda na jaho terytoryi pamior pieršy nośbit karanavirusa za miežami Kitaja. Adrazu paśla hetaha ŭłady rehijona ŭviali žorstkija karancinnyja miery i praviali dva raŭndy testavańnia na SARS-CoV-2 praktyčna dla ŭsich žycharoŭ kamuny.
Navukoŭcy skarystalisia vynikami hetych pravierak, kab acanić, jak šmat ludziej z COVID-19 stanoviacca schavanymi pieranosčykami infiekcyi, nie vyjaŭlajučy pry hetym nijakich bačnych simptomaŭ chvaroby. Sabraŭšy proby ich makroty i vydzialeńniaŭ z nosa, bijołahi padličyli kolkaść zaražanych i paraŭnali ich z tym, jak šmat pacyjentaŭ z karanavirusnaj infiekcyjaj apynulisia ŭ balnicach abo atrymlivali lačeńnie ŭ toj ci inšaj formie.
Jak akazałasia, u apošnija dni lutaha nośbitami virusa było kala 2,6% žycharoŭ Vo. Da siaredziny sakavika ich dola źniziłasia da 1,2% dziakujučy ŭviadzieńniu žorstkich epidemijałahičnych mier. Dola bieśsimptomnych pieranosčykaŭ infiekcyi siarod ich była vielmi vysokaja jak u pieršyja dni raźvićcia epidemii, tak i pry paŭtornaj praviercy, dasiahajučy adznaki ŭ 40% i bolš.
Što cikava, navukoŭcy nie znajšli istotnych adroźnieńniaŭ u suadnosinach padobnych nośbitaŭ SARS-CoV-2 siarod maładych i pažyłych žycharoŭ Vo, niahledziačy na toje što apošnija pakutavali ad COVID-19 značna čaściej.
Abodva typy nośbitaŭ virusa, pa słovach miedykaŭ, adnolkava «efiektyŭna» raspaŭsiudžvali infiekcyju i vypracoŭvali virusnyja čaścicy prykładna paroŭnu. Najaŭnaść choć by adnaho chvoraha ŭ siamji amal harantavana (u 82% vypadkaŭ) pryvodziła da taho, što COVID-19 zajmieli jaho svajaki i blizkija. Jak praviła, virus pieradavaŭsia novym ludziam praz kožnyja 7,2 dnia.
Padobnaja chutkaść raspaŭsiudžvańnia virusa, jak adznačajuć Kryzanci i jaho kalehi, aznačaje, što prykładna 86% žycharoŭ Vo byli b zaražanyja SARS-CoV-2, kali b ułady rehijona nie ŭviali karancin. Sacyjalnaja izalacyja i inšyja miery dapamahli źnizić chutkaść raspaŭsiudžvańnia virusa na 98%, u vyniku čaho karanavirusam zaraziłasia tolki 5% žycharoŭ Vo. Heta abaraniła miedycynskuju infrastrukturu Vieniecyi i jaje navakolla ad poŭnaha kałapsu, prychodziać navukoŭcy da vysnovy.
