Jak vytrymać niekalki tydniaŭ samaizalacyi ŭ siamji i nie rassvarycca. Raić psichołah
U Kitai i Jeŭropie pa skančeńni terminu karancinu prahnazujuć pik rostu razvodaŭ.
Dla siemjaŭ čakajecca nie samy prosty čas. Ujavicie sami, kali ty zakryty ŭ adnym pamiaškańni sa svajoj pałavinaj i dziećmi na doŭhi termin, to treba prajaŭlać nie aby-jakija navyki ciarpieńnia. Luby nievialiki kanflikt moža pieraraści ŭ sapraŭdnuju svarku, a jana dać jašče bolš sumnyja vyniki. Jak hetaha možna paźbiehnuć? «Naša Niva» spytała ŭ psichołaha Siarhieja Šłapaka.
Fota z sajta 1prof.by.
«Kali ludzi razychodziacca ŭ takich abstavinach, to padobna, što ŭsio da hetaha jakraz i išło. Ludzi narešcie sustrelisia i narešcie zrazumieli: heta dobra, što jany razychodziacca.
Kali žonka syšła da inšaha, to nieviadoma kamu pašancavała bolš. Mnie zdajecca, što tut padobnaja historyja. Kali za paru tydniaŭ karancinu takoje adbyvajecca, to było ŭžo pozna niešta mianiać.
Samaja prostaja parada — heta pasprabavać razmaŭlać miž saboj. Razvodziacca praz što? Praz kanflikty. Heta značyć, što niechta niešta nie ŭdakładniŭ, zastałosia niedamoŭlenaje.
Na takim etapie treba viarnucca da taho, kab prosta havaryć. Isnuje šaścikrokavaja madel rašeńnia kanfliktu: što ty chočaš, što ty robiš, što mnie chaciełasia i h.d.
Pačynajecca ŭsio z razmovy. Ja dapuskaju, što byvajuć takija vypadki, kali kacilisia-kacilisia pa najezdžanych rejkach, a tut niešta adbyvajecca niezvyčajnaje, jak hety karancin, i ludzi razumiejuć, što seksualnaj ciahi pamiž imi niama, razmaŭlać niama pra što, a jašče z abaich bakoŭ jość škilety ŭ šafie, jakija ŭžo nievynosna chavać, i jany vyłaziać vonki.
Tut pytańnie ŭ razumnaści padychodaŭ, varta prymianiać tuju ž šaścikrokavuju madel. Ja nie biaru pad uvahu vypadki, kali ŭ kahości jość kachanki. Heta ŭžo zusim inšaje.
Kali para nie choča zachavać siamju, to treba dažyć jak čužyja ludzi, bieskanfliktna, ci raźjechacca pa roznych pakojach, albo kvaterach, kali karancin nie vielmi strohi. Heta kali nievynosna znachodzicca razam. Kali ludzi chočuć zachavać siamju, ale bačać, što niešta nie składvajecca, zhubili temy dla razmoŭ, treba brać i šukać niešta ahulnaje. Samaje prostaje — abmierkavańnie filmaŭ i sieryjałaŭ.
Treba razmaŭlać na takija temy, jakija viadomyja abaim bakam. Heta i tyja ž filmy, knižki, pra ahulnych siabroŭ i znajomych. Kali raptam u kahości chvaravitaja pazicyja, to relihijnyja ci palityčnyja pytańni nie padymać. Varta pavialičvać ahulnuju kolkaść viedaŭ adno pra adnaho.
Dazvolić sabie niejkija kantaktnyja rečy. Hruminh — heta dohlad adno za adnym.
Toj ža masaž, pahładzić pa śpinie, nožki pažmiakać, vałasy pryčasać adno adnamu, vannu razam pryniać.
Taki kantakt u miakkaj formie bieź pierachodu da bolšaha, bo ja dapuskaju, što eratyčny zapał moh źniknuć. I ludziam treba znoŭ pryvyknuć adno da adnaho.
Byvaje takoje, što pierastaje padabacca pach partniora, i tady treba vielmi pastaracca, kab naładzić adnosiny. Viadoma, seks — heta nie samaje hałoŭnaje ŭ adnosinach, ale jon hraje dastatkova vialikuju rolu. Tak pa krychu pavialičycca abjom stasavańnia i palapšeńnia adnosin. Heta faktyčna adziny sposab.
Sumiesnaja dziejnaść vielmi važnaja: prybirańnie, hatavańnie ježy, myćcio posudu, ramontnyja pracy niejkija. Ništo tak nie abjadnoŭvaje, jak sumiesnaja dziejnaść i razmovy. Kali vam nievynosna razam znachodzicca, to možna na čas raźjechacca.
Jość i inšy momant: kali dvaich simpatyčnych adno adnamu ludziej zamykajuć u adnym pamiaškańni, to isnuje vysokaja vierahodnaść, što jany zojmucca seksam, a ŭ vyniku zaciažarać. Davajcie ŭspomnim, kali ŭ 2000 hodzie adbyŭsia pažar na Astankinskaj viežy i spynilisia tranślacyi na telebačańni. Navat hetaha było dastatkova, kab praz 9 miesiacaŭ adbyŭsia ŭsplosk naradžalnaści. A kali budzie dva tydni karancinu, to ja ŭpeŭnieny, što budzie nievialiki bebi-bum».
