Piać sieryjałaŭ, jakija varta pahladzieć u lutym
Najlepšyja šmatsieryjnyja stužki, jakija možna ŭbačyć u apošni miesiac zimy. U našym śpisie buduć jak premjery, tak i sieryjały, jakija viartajucca ŭ efir paśla pierapynku.
«Narka: Mieksika» (Narcos: Mexico)
Kryminalnaja drama. ZŠA, Mieksika, 2-i siezon
Sieryjał «Narka», jaki praciahvaŭsia try siezony, zajmieŭ vializnuju papularnaść va ŭsim śviecie. Pieršyja dva siezony — heta supraćstajańnie amierykanskich ahientaŭ UNB (upraŭleńnie pa baraćbie z narkotykami) ź lehiendarnym narkabaronam Pabła Eskabaram. Hety čałaviek stvaryŭ vializnuju nielehalnuju impieryju i staŭ adnym z najbahaciejšych ludziej płaniety. Eskabar nastolki adčuvaŭ svaju biespakaranaść i usiemahutnaść, što navat vynošvaŭ płany stać prezidentam Kałumbii. Treci siezon — heta baraćba z narkakartelem Kali, jaki trymaŭsia ŭ pieršuju čarhu nie na sile i zapałochvańniach, a na intelekcie i chitrykach.
Paśla hetaha «Narka» pierajazdžaje ŭ Mieksiku. Płanavałasia spačatku, što historyja narkakartela Hvadałachary i jaho lidara Fieliksa Haljarda razhorniecca ŭ čaćviortym siezonie, ale ŭ vyniku byŭ stvorany asobny sieryjał. U «Mieksicy» budzie ŭsio toje, za što palubili «Narka»: intryhoŭnaja historyja, palityka, žorstkaść, chitrasplacieńni, chabarnictva, asabistaja mužnaść i zdrady. Rejtynh krychu mienšy, čym u kłasičnych «Narka», ale hladzieć usio adno varta.
«Vidaźmienieny vuhlarod» (Altered Carbon)
Kibierpank. ZŠA, 2-i siezon
XXVII stahodździe. Ujavim, što čałaviek moža nie «pamirać»: u niahodnaść prychodzić tolki jahonaje cieła, a voś pamiać, uspaminy, charaktar možna zachavać na admysłovych nośbitach, paśla čaho pierazalić u inšyja cieły, jakija razhladajucca jak prosta «sasudy». Bahaciei mohuć stvarać biaskoncuju kolkaść ułasnych kopij, pry hetym zaŭždy zastajučysia maładymi. Heta adnačasova i vialiki dar, ale i vialikaje vyprabavańnie.
Hałoŭnym hierojam sieryjała źjaŭlajecca najomny zabojca ź dziŭnym japonska-bałkanskim imiem Takiešy Kovač. Jon «pračynajecca» praz 250 hadoŭ nie ŭ svaim ciele, jaho najmajuć rasśledavać pakušeńnie na miljardera Łorensa Bekfarda, ale, viadoma, heta tolki adno sa źvionaŭ bolš zabłytanaha łancužka.
Sieryjał źniaty pavodle knihi brytanca Ryčarda Morhana, napisanaj u 2002 hodzie, heta kłasika litaraturnaha žanru kibierpank.
«Radzima» (Homeland)
Palityčny tryler. ZŠA, 8-y siezon
Kultavy sieryjał «Radzima» padychodzić da finišu, 9 lutaha pačniecca apošni siezon. Za čas efiru Homeland atrymaŭ šeść «Załatych hłobusaŭ» i dziesiać «Emi». Dla mnohich raźvitańnie z šou stanie niepryjemnym siurpryzam, ale stvaralniki kažuć, što sieryjał kančatkova siabie vyčarpaŭ.
Marpiech Nikałas Broŭdzi šmat hadoŭ pravioŭ u pałonie ŭ bajevikoŭ z «Al-Kaidy». Padčas adnoj z kontrapieracyj amierykancaŭ u ich atrymlivajecca vyzvalić Broŭdzi z pałonu, choć jon daŭno ličyŭsia pamierłym. Na radzimie marpiecha ŭsie ličać hierojem, aproč supracoŭnicy CRU Keci Mecisan, jakaja ličyć, što Broŭdzi byŭ zavierbavany terarystami i rychtuje niešta niadobraje ŭ ZŠA. Dyk chto hety čałaviek: uzor, na jakoha mohuć raŭniacca inšyja, ci zdradnik?
«Palaŭničyja» (Hunters)
Drama. ZŠA, 1-y siezon
Mabyć, samaja čakanaja navinka miesiaca. Ńju-Jork, 1977 hod. Druhaja suśvietnaja vajna skončyłasia ŭžo bolš za tryccać hadoŭ tamu, ale častka nacysckich złačyncaŭ pa-raniejšamu vynošvaje płan usiaśvietnaha vaładarańnia i pabudovy Čaćviortaha Rejchu. Hetyja ludzi daŭno asieli ŭ Štatach, dzie i platuć svaje padstupnyja płany.
Supraćstajać nacystam u hetym budzie tak zvanaja hrupa «palaŭničych», u jakuju sabralisia ludzi samych roznych prafiesij, z roznym bekhraŭndam i imknieńniami. Uznačalvaje «palaŭničych» Miejer Ofierman, jakoha syhraŭ znakamity Al Pačyna, čałaviek, jaki pieražyŭ Aśviencim, a ciapier pastaviŭ za metu nie dapuścić taho, kab nacysty realizavali svaje pomysły.
Pradziusar sieryjała Džordan Pił tak adrekamiendavaŭ šou: «Kali ja pačuŭ ideju, to adrazu zrazumieŭ, što pavinien udzielničać. Heta katarsis. Heta nuar. Heta žachliva aktualna. Heta mienavita toje, što ja chaču ŭbačyć pa televizary». Sieryjał budzie źniaty častkova na realnych padziejach.
«Klučy Łokaŭ» (Locke & Key)
Žachi, drama. ZŠA, 1-y siezon
Sieryjał źniaty pavodle komiksaŭ, jakija malavaŭ Džo Chił — syn karala žachaŭ Styviena Kinha. Paśla śmierci baćki Tajler, Kinsi i Bodzi Łok razam sa svajoj maci pierajazdžajuć u haradok Łaŭkraft (absalutna nievypadkovaja nazva) u rodavy majontak «Dom klučoŭ». Tam jany spadziajucca na cichaje žyćcio, ale siamju pačynaje pieraśledavać adzin z zabojcaŭ baćki, a ŭ domie jany znachodziać mistyčnyja klučy, jakija nadzialajuć padletkaŭ zvyšnaturalnymi siłami. Džo Chił, padobna da baćki, daśleduje traŭmy i spadčynu hałoŭnych hierojaŭ. Sieryjał maje niaprostuju historyju ekranizacyi, jaho zdymki źbiralisia pačać jašče 10 hadoŭ tamu, ale stužka tak i nie źjaviłasia na ekranach. Paśla hetaha jana jašče mianiała kanał, na jakim pavinna była adbycca premjera. Urešcie za realizacyju ŭziaŭsia dobra ŭsim viadomy Netflix.
Hladzi taksama:
Piać sieryjałaŭ, jakija varta pahladzieć u studzieni
Piać sieryjałaŭ, jakija varta pahladzieć u śniežni
Piać sieryjałaŭ, jakija varta pahladzieć u listapadzie
