Bołtan — Łukašenku: ZŠA cikaviać pravy čałavieka i nieraspaŭsiudžvańnie zbroi
Daradca prezidenta ZŠA pa nacyjanalnaj biaśpiecy Džon Bołtan prapanavaŭ kiraŭniku Biełarusi abmierkavać pytańni rehijanalnaj biaśpieki i dvuchbakovaha supracoŭnictva, vykazaŭšy mierkavańnie, što ŭ bakoŭ atrymajecca znajści ahulnuju movu. Pra heta jon zajaviŭ na sustrečy z Alaksandram Łukašenkam, piša BIEŁTA.
«Liču, heta vielmi dobraja mahčymaść pravieści razmovu pa niekalkich vielmi važnych temach — rehijanalnaj biaśpiecy, dvuchbakovym supracoŭnictvie, — skazaŭ Džon Bołtan. — Jość niekalki pytańniaŭ, jakija vielmi cikaviać ZŠA: pravy čałavieka, nieraspaŭsiudžvańnie zbroi. Ja zhodny z vami, što my pavinny być hranična adkryty pa hetych temach. Dumaju, my zmožam znajści supolnuju movu».
Džon Bołtan taksama adznačyŭ značnyja źmieny, jakija adbylisia ŭ adnosinach pamiž Biełaruśsiu i ZŠA, i nazvaŭ temy, jakija chacieŭ by abmierkavać padčas svajho vizitu. «Historyja nie staić na miescy. Užo prajšło dastatkova šmat času z raspadu Savieckaha Sajuza, hieapalityčnaja situacyja źmianiłasia. Jana mianiajecca navat padčas našaj razmovy. Tamu jość rehijanalnyja pytańni, jość pytańni, źviazanyja z krainami, jakija hieahrafična znachodziacca daloka adsiul, ale jany taksama ŭpłyvajuć na situacyju tut. Heta my taksama chacieli b abmierkavać z vami», — rastłumačyŭ jon, dadaŭšy, što ź nieciarpieńniem čakaje mahčymaści abmianiacca dumkami pa hetych pytańniach z kiraŭnikom Biełarusi.
