Ci možna zajmacca seksam padčas ciažarnaści i miesiačnych? Za i suprać
Niahledziačy na toje, što i miesiačnyja, i ciažarnaść — zvyčajnyja fizijałahičnyja pracesy, čamuści pieršy ŭvohule soramna abmiarkoŭvać, a z druhim usio jašče źviazana šmat zababonaŭ. Asabliva kali zavodzić havorku pra seksualnyja stasunki padčas hetych pieryjadaŭ.
Hiniekołahi kliniki «Jeva» adznačajuć, što dla mnohich pacyjentak i kaleh navat sama ideja seksu ŭ dni mienstruacyi vyhladaje dziŭnaj. Asabliva čyrvaniejuć u momant jaje zhadki žančyny stałaha ŭzrostu, u toj momant jak moładź hladzić na praces užo kudy praściej.
Raspytalisia ŭ miedycynskaj dyrektarki, doktarki akušera-hiniekołaha kliniki «Jeva» Aleny Čartko pra samyja raspaŭsiudžanyja sumnieńni, jakija supravadžajuć hetyja temy.
Seks padčas miesiačnych
Fota: sncmedia.ru.
Alena Jaŭhieńjeŭna kaža, kali pałavy kantakt adbyvajecca pamiž partniorami, jakija znachodziacca ŭ praciahłych stasunkach, i kroŭ nie zasmučaje nivodnaha ź ich, to prablemy tut niama (kali chtości baicca zapeckać adzieńnie ci bializnu, možna zajmacca seksam u dušy ci pasłać na łožak dadatkovuju tkaninu). Zrazumieła, što ŭ vypadku mocnaha kryvacioku i bolaŭ u partniorki lepš zrabić paŭzu — sačycie za nastrojem i žadańniami adno adnoha.
Praŭda, pry lubym scenaryi (z pastajannym partnioram ci nie) pažadana karystacca preziervatyvami: padčas mienstruacyi pavyšajecca ryzyka padchapić infiekcyju. Usio ž mienstruacyja — heta svojeasablivaja pravakacyja dla arhanizma, padčas jakoj abaronnyja imunnyja siły źnižajucca.
A što z ryzykaj zaciažaryć?
U pieršyja dni mienstrualnaha cykła vierahodnaść zaciažaryć źnižajecca da minimumu, ale ŭsio projdzie biez «nastupstvaŭ» tolki ŭ tym vypadku, kali ŭ vas stabilny, naprykład, 28-dzionny cykł, jaki nie vybivajecca z hrafika. Varta tolki avulacyi pačacca krychu raniej, cykłu źbicca, i vierahodnaść zaciažaryć pavialičvajecca: usio ž śpiermatazoid žyvie 3—4 dni, i jon moža dačakacca tuju samuju jajcakletku.
Ahułam ža kalandarny mietad kantracepcyi pryznany samym nienadziejnym.
Što rabić z seks-cackami?
Nijaki asablivych instrukcyj pa vykarystańni seks-cacak padčas miesiačnych niama (kaniečnie, kali vy ich papiarednie pamyli). Kali vy karystajeciesia łubrykantami, to pažadana spynicca na tych, što na vodnaj ci silikonavaj asnovie.
Plusy ad seksu ŭ «hetyja» dni jość?
Padčas arhaźmiravańnia moža pavialičvacca kolkaść kryvianistych vydzialeńniaŭ, i takim čynam sama mienstruacyja skončycca raniej: čysta miechanična endamietryj, unutranaja ślizistaja abałonka cieła matki, chutčej «vyjdzie» vonki.
Pałavy kantakt, darečy, moža paspryjać chutčejšamu pačatku mienstruacyi, kali ŭ žančyny nazirajecca zatrymka. Pacyjentki, jakija prychodzili na pryjom sa skarhami na doŭhuju zatrymku, na nastupny ž dzień paśla UHD z vahinalnym datčykam paviedamlali, što miesiačnyja ŭ ich narešcie pajšli. To bok dapamahła ŭ hetym stymulacyja.
Što adbyvajecca ź libida?
Na fizijałahičnym uzroŭni padčas mienstruacyi libida źnižajecca. Jaho pik zvyčajna prychodzicca na siaredzinu fazy, padčas avulacyi, kali ŭ žančyny pačynaje saśpiavać jajcakletka.
Kali sprava dachodzić da miesiačnych, to tut užo harmony na nuli. Kali ŭ kahości padčas mienstruacyi pavialičvajucca žadańnie, to tut, chutčej, rolu hrajuć emocyi.
Seks padčas ciažarnaści
Fota: mesyachnyedni.ru.
Pa słovach Aleny Čartko, kali ŭ budučaj maci adsutničajuć prablemy sa zdaroŭjem, niama ryzyki pieraryvańnia ciažarnaści, to nijakich zabaron na seks niama. «Kali ŭ žančyny jość ryzyka vykidyšu, to dla jaje sam fakt pałavoha aktu ci navat uviadzieńnie lusterka padčas mazka farmirujuć naviaźlivyja dumki pra toje, što heta moža paškodzić płodu. Pra jakoje zadavalnieńnie ad seksu tut moža iści havorka?»
Dazvoł raspaŭsiudžvajecca na luby trymiestr ciažarnaści?
Treba pamiatać, što ŭ ciažarnych zaŭsiody źnižajecca imunitet: usio ž u ich žyvacie «siadzić» inšy čałaviek. Heta vymušanaja miera, kab arhanizm jaho nie adryńvaŭ. Možna paraŭnaść praces z transpłantacyjaj: kali pierasadžvajuć niejki orhan, u arhanizm papiarednie ŭvodziać preparaty, jakija taksama źnižajuć imunitet.
My ŭsie viedajem, što my nie sterylnyja, unutry nas žyvuć miljony mikraarhanizmaŭ. U narmalnym stanie arhanizm samastojna rehuluje kolkaść hetych mikraarhanizmaŭ, ale kali imunitet źnižajecca, jany pačynajuć bujna razmnažacca. Mienavita tamu my rekamiendujem pacyjentkam padčas ciažarnaści seks s preziervatyvam, asabliva ŭ treci trymiestr.
Akramia taho, u śpiermie mužčyn utrymlivajucca prastahłandziny — harmony, jakija mohuć vyklikać rańni pačatak rodaŭ: navat na niekalki tydniaŭ raniej, čym treba.
Pozy i libida
Što tyčycca poz, to tut kožnaja para pavinna znachodzić zručnuju im. Nie zabyvajcie, što luby pałavy akt nie musić być zanadta aktyŭnym.
Kali mierkavać pa raskazach, to adčuvańni padčas seksu ŭ momant ciažarnaści taksama źmianiajucca: tak, mnohija žančyny adznačajuć, što ich arhazm staŭ jarčejšym, a hrudzi bolš čullivymi.
Što tyčycca seksualnych žadańniaŭ, to ź miedycynskaha punktu hledžańnia ŭ arhaniźmie ciažarnych vypracoŭvajecca bolš, čym zvyčajna, žanočych pałavych harmonaŭ — estrahienaŭ. Heta niaredka pryvodzić da pavyšeńnia seksualnaha žadańnia.
