Dzień, kali Charvatyja moža stać čempijonam śvietu
Siońnia finał: Francyja — Charvatyja. Kamanda nievialikaj krainy moža stać čempijonam śvietu. Charvaty pa šlachu da finału vyjhrali va ŭsich matčach u hrupie (Nihieryja, Arhiencina i Isłandyja), a voś u płej-of dabiralisia da hałoŭnaj hulni hoda praź sieryju pienalci ŭ 1/8 finału i 1/4 finału, a ŭ paŭfinale ŭ dadatkovy čas pieramahli Anhliju.
fifa.com
Chto lidary charvackaj kamandy, jakija mohuć prynieści «šašačnym» histaryčnuju pieramohu?
Łuka Modryč
Modryč vyras u partovym horadzie Zadar. Adtul pachodziŭ rymski impieratar Dyjakletyjan, jaki dobraachvotna syšoŭ u adstaŭku. Astatak žyćcia jon pravodziŭ u Charvatyi. Lehienda kaža, što Dyjakletyjana sprabavali ŭhavaryć viarnucca ŭ Rym, na što mudry kiraŭnik adkazaŭ: «Kali b vy bačyli kapustu, jakuju ja vyraściŭ, to nikoli b nie prapanoŭvali mnie heta».
Modryč — adzin z tych futbalistaŭ, kaho možna nazyvać «dziećmi vajny».
Łuka zhadvaŭ, što byvała i takoje, kali na trenirovačnaje pole prylatała hranata i dzieci ŭsie chavalisia.
U tuju vajnu krainskija sierby žorstka zabili dzieda Modryča i jašče šeść starych ź ichnaj vioski. Baćka Stepie Modryč ramantavaŭ aŭtamabili dla charvackaj armii.
«Jon byŭ zanadata chudy i vielmi maleńki, kab niechta padumaŭ, što ź jaho vyraście futbalist», — kazaŭ staršynia FK «Split» Josip Bžeła. Modryč i ciapier nie ŭražvaje svaimi habarytami: jahony rost usiaho 172 sm, a vaha — 66 kh. Pry hetym Łuka źjaŭlajecca adnym z samych razumnych hulcoŭ sučasnaści.
Karjeru Modryč pačaŭ u zahrabskim «Dynama», ale paśla jaho addali ŭ arendu ŭ baśnijski kłub «Zryński». Tam Modryč stanovicca najlepšym hulcom lihi. Paśla hetaha karjera charvata pajšła tolki ŭhoru. Jon zamacoŭvajecca ŭ asnoŭnym składzie «Dynama», potym pierachodzić u «Totenchem», a ŭžo adtul u «Reał», u składzie jakoha 4 razy pieramahaje ŭ Lizie čempijonaŭ.
U asabistym žyćci Łuka žanaty z Vaniaj Bośnič, jakaja pracavała jahonaj… ahientkaj. Jany paznajomilisia ŭ 2006 hodzie, a pabralisia šlubam u 2010. U pary syn i dačka.
Ivan Rakicič
Futbalist pryjšoŭ na śviet u maleniečkim horadzie Miolin na poŭnačy Šviejcaryi. Tudy jahonaja siamja pierajechała z Charvatyi. Baćki — Łuka i Kacia — adčuvali napružanaść, jakaja ŭzrastała ŭ Juhasłavii, tamu pryniali rašeńnie źjechać z krainy jašče da vajny. Baćka pracavaŭ prostym budaŭnikom. Ivan, darečy, taksama pastupaŭ u budaŭničy kaledž.
Ivan nikoli nie byŭ cierpialivym vučniem u škole. Jon adrazu pryniaŭ rašeńnie, što lepš źviaža siabie z futbołam, čym budzie čytać knižki. I, na dziva, u jaho heta atrymałasia. U 14 hadoŭ jon trapiŭ u strukturu futbolnaha kłuba «Bazel», a praz try hady prabiŭsia ŭ asnoŭny skład.
Vybar nacyjanalnaj zbornaj dla Rakiciča byŭ vielmi składany. Jon doŭha vahaŭsia, abirać Charvatyju ci Šviejcaryju, u jakoj vyras. Vybar paŭ na Charvatyju, baćki kažuć, što nie ŭpłyvali na syna, ale byli hetamu vielmi radyja. Paśla hetaha Rakiciču prychodzili pahrozy ad zaŭziataraŭ, jaho aśvistvali na stadyjonach. Maŭlaŭ, dla kaho my padrychtavali futbalista. Paśla rašeńnia Ivana baćku admovili ŭ atrymańni hramadzianstva Šviejcaryi.
U 16 hadoŭ Ivan advierh prapanovu ad ahientaŭ Žaze Maŭryńju, jaki klikaŭ charvata da siabie ŭ «Čełsi». Z Šviejcaryi Rakicič spačatku źjechaŭ u niamiecki «Šalkie-04», a paśla ŭ ispanskiju «Sievilju». Mienavita ŭ Ispanii jon sustreŭ svajo kachańnie — heta aficyjantka Rakiel Maŭry. Jana prynosiła futbalistu zamoŭleny tort. Ciapier u pary dźvie dački.
Sam Rakicič hulaje ŭ asnoŭnym składzie «Barsiełony» pobač ź Miesi i Suaresam.
Dejan Łoŭren
29-hadovy abaronca «Livierpula». Jon rodam z baśnijskaj Zienicy. I ŭspaminy pra vajnu vielmi jarka zachavalisia ŭ chłopca. «My byli z mamaj doma, kali pačuli sireny, było nievierahodna strašna. Jana ŭziała mianie na ruki i adniesła ŭ padvał, mama ŭvieś čas płakała. Heta toje, što ja nikoli nie zabudu. Jak takoje možna zabycca? Paśla taho, jak usio stała cicha pryjšoŭ naš dziadźka, jaki na stareńkim aŭtamabili «Juha» advioz nas u Niamieččynu. Tak my stali biežancami», — raskazvaŭ Dejan.
U Miunchienie žyŭ dzied Dejana pa maci. «Kali b my zastalisia ŭ Bośnii, to maje baćki mahli b być zabitymi, jak i ja», — kazaŭ Łoŭren.
Małomu Dejanu nie spatrebiłasia šmat času, kab zvyknucca da niamieckich realij. Navat u dziciačym sadku jon byŭ daloka nie adzinym «baśnijcam». «Baćkam, viadoma, było našmat ciažej», — kaža futbalist.
Na vośmy hod žyćcia ŭ Niamieččynie ŭłady adchili prašeńnie baćkoŭ Łoŭrena na novuju vizu. Siamji daviałosia viartacca ŭ Charvatyju, u horad Karłavac. Zrešty, futbalist kaža, što biez hetych vyprabavańniaŭ nie zmoh by stać tym, kim jość zaraz.
Daniel Subašyč
33-hadovy bramnik «Manaka» staŭ hierojem 1/8 finała. U sieryi pienalci Daniel Subašyč zmoh vyciahnuć try ŭdary. «Suba» ź dziacinstva zvyksia da ciažkaściaŭ.
Jon naradziŭsia ŭ siamji pravasłaŭnaha sierba i charvatki-katalički ŭ kurortnym Zadary. Sierbskaje pachodžańnie jašče ni raz aŭkniecca Danielu. Naprykład, baćka jahonaj dziaŭčyny Antonii byŭ kateharyčna suprać adnosin dački z Subašyčam. Maŭlaŭ, jon sierb, pra što moža iści havorka? Zrešty, maładych heta nie spyniła.
Dva hady Daniel dumaŭ ab tym, jak nie trapić pad bambiožki. Rost Daniela 192 sm, tamu ŭ dziacinstvie jon bolš hulaŭ u baskietboł. A kali pryjšoŭ na pieršuju futbolnuju treniroŭku, to adrazu skazaŭ, što choča stać bramnikam, bo jamu padabajecca adčuvać adkaznaść.
Z Charvatyi Subašyč źjechaŭ u 27 hadoŭ, dastatkova stały ŭzrost. Usie apošnija šeść hadoŭ jon stabilna vystupaje za «Manaka». Za ŭsiu karjeru ŭ charvata było ŭsiaho try kłuby: «Zadar», «Chajduk» i «Manaka». Zajzdrosnaja dla ciapierašniaha dnia stabilnaść.
Paśla hulni z Danijaj Subašyč pakazaŭ majku z svaim siabram dziacinstva Chrvoje Čuścičam, jaki ŭ 24 hady pamior ad strašnaj čerapna-mazhavoj traŭmy, jakuju atrymaŭ padčas hulni čempijanatu Charvatyi. Bramnik nazyvaje Čuściča svaim «aniołam-achoŭnikam».
Marya Mandžukič
Naradziŭsia Marya ŭ haradku Słavonski-Brod na miažy z Bośnijaj. Štodnia horad bambili, a Marya ź siastroj Ivanaj chavalisia ŭ sutareńniach. Praŭda, u 1992-m siamja źjazdžaje ŭ Hiermaniju. Sprava ŭ tym, što baćka Marya Miču, taksama futbalist, zaklučyŭ kantrakt z małym kłubam «Dytcynhien». Heta i dazvoliła pieražyć vajnu ŭ spakojnych umovach.
Tam siamja pražyła čatyry hady, a paśla taho, jak było admoŭlena ŭ vidzie na žycharstva, znoŭ viarnułasia ŭ Charvatyju.
Futbalist Mandžukič nie vyłučajecca asablivym majsterstvam. Jon nie samy jarki i techničny, ale ŭmieje rabić hałoŭnaje — zabivać hały. Ciapier jon zabivaje za «Juvientus».
Kali sočycie za čempijanatam śvietu pa futbole, raim vam zrabić staŭku ŭ Bukmiekierskaj kantory Marafon!
Apytanka
