FIFA nie budzie karać futbalista Vidu za videa z frazaj «Słava Ukrainie! Białhrad, pali!»
FIFA nie budzie karać hulca charvackaj zbornaj Damahoja Vidu za druhoje videa, dzie jon usklikvaje: «Białhrad, pali!» i «Słava Ukrainie!». Raniej fiederacyja aštrafavała Vidu i vyniesła jamu papiaredžańnie.
Pra heta RBK paviedamiła pres-słužba fiederacyi.
Kiraŭnik dyscyplinarnaha kamiteta FIFA «paśla poŭnaha analizu» druhoha videa z udziełam Vidy vyznačyŭ, što jano było zapisana pierad tym, jak FIFA abviaściła pra svajo pieršaje rašeńnie ab pakarańni Vidy. «Nijakaha dadatkovaha parušeńnia praviłaŭ FIFA nie było», — havorycca ŭ paviedamleńni FIFA.
Paśla pieramohi nad zbornaj Rasii ŭ čverćfinale čempijanatu śvietu pa futbole źjaviłasia dva videa z udziełam Vidy.
Za pieršaje ź ich FIFA vyniesła papiaredžańnie Vidu i aštrafavała jaho na 15 tysiač šviejcarskich frankaŭ. Na hetym videaroliku Vida vitaŭ usich vokličam «Słava Ukrainie», a druhi člen charvackaj delehacyi, Ohnien Vukojevič, jaki vykonvaŭ rolu pamočnika treniera zbornaj, zajaŭlaŭ, što heta była pieramoha «za «Dynama» i Ukrainu». Abodva charvata raniej hulali za kijeŭskaje «Dynama».
Charvacki futbolny sajuz paśla hetaha apublikavaŭ zajavy, dzie havaryłasia, što Vukojevič i Vida prynosiać prabačeńni za svaje słovy, jakija «nie mieli palityčnych kanatacyj, ale, na žal, pakinuli mahčymaść dla takoj interpretacyi». Sam Vida taksama vybačyŭsia pierad rasijskimi zaŭziatarami. «Ja zrabiŭ pamyłku. Ja chaču jašče raz paprasić prabačeńnie pierad ruskimi ludźmi. Vybačajcie, heta žyćcio. Treba vučycca na pamyłkach», — skazaŭ jon tady.
Na druhim videa, jakoje taksama źjaviłasia paśla taho, jak Charvatyja abyhrała Rasiju, Vida siadzieŭ pobač z eks-hulcom nacyjanalnaj kamandy Ivicam Oličam (jaki ciapier uvachodzić u trenierski štab kamandy) i piŭ piva. Abmiarkoŭvajučy z kimści futboł, Vida pramaŭlaje «słava Ukrainie», «Białhrad, pali!», a dalej śpiavaje pieśniu na sierbskaj movie.
Jak paviedamlała vydańnie Blic, futbalist, jak miarkujecca, kamunikavaŭ pa internet-suviazi z supracoŭnikami restarana «Białhrad» u Kijevie, u jakim pracujuć pradstaŭniki juhasłaŭskaj dyjaspary va ŭkrainskaj stalicy. U kancy jon pieradaje pryvitańnie svajmu znajomamu Jovanu.
Ź videazapisu niemahčyma dakładna zrazumieć, kali i dzie jon byŭ zrobleny. Adnak Vida i Olič siadziać u formie, vyrablenaj da čempijanatu śvietu ŭ Rasii. Pa dadzienych Blic, zapis byŭ zrobleny paśla čverćfinalnaha matču, u jakim charvaty pa pienalci abyhrali zbornuju Rasii. Taksama nie było dadzienych ab tym, chto mienavita zapisaŭ hetaje videa.
Kali sočycie za čempijanatam śvietu pa futbole, raim vam zrabić staŭku ŭ Bukmiekierskaj kantory Marafon!
Apytanka
