Čechija, Narviehija, Kanada i ZŠA vystupili za pazbaŭleńnie Rasii pravoŭ na praviadzieńnie bijatłonnych spabornictvaŭ
Prezident Sajuza bijatłanistaŭ Čechii Iržy Chamza padzialiŭsia mierkavańniem pra toje, jak treba vyrašać pytańnie z dopinham u rasijskim bijatłonie.
«Heta žudasna. Toje, što napisana ŭ zapiscy Makłarena, zdajecca niejkaj navukovaj fantastykaj. Niejmavierna, kab kraina vydatkoŭvała biudžetnyja srodki na dziaržaŭnuju dopinh-sistemu. Havorka idzie nie tolki pra bijatłon, ale pra ŭvieś sport», — skazaŭ Chamza.
Čechija vystupiła za pazbaŭleńnie Rasii pravoŭ na praviadzieńnie bijatłonnych turniraŭ, u pryvatnaści etapu Kubka śvietu hetaha siezona i čempijanatu śvietu-2021 u Ciumieni, čempijanatu śvietu siarod junijoraŭ u Ostravie. Hetaje rašeńnie padtrymali narviežskaja, kanadskaja, amierykanskaja i niekatoryja inšyja fiederacyi.
Na dumku Chamzy, IBU zrabiŭ pamyłku ŭžo tady, kali abraŭ Ciumień miescam praviadzieńnia čempijanatu śvietu-2021.
«Ja nie dumaju, što ŭsie ruskija prymali dopinh. Asabliva Šypulin, jaki ŭ dakładzie Makłarena chutčej za ŭsio nie fihuruje. Ale ŭ dadzienym vypadku my ŭsio roŭna pavinny zaniać ćviorduju pazicyju. Pazbaŭleńnie pravoŭ na praviadzieńnie spabornictvaŭ - pieršy krok. Potym buduć uśled inšyja, kali budzie nieabchodnaść», - raspavioŭ Chamza.
