Лукашэнка заявіў, што польскага дэзерціра Чэчку забілі
Таксама ён даручыў прыставіць да збеглага польскага суддзі Шміта ахову.
Эміль Чэчка. Фота: БелТА
Лукашэнка ўчора, 9 мая, пасля ўскладання кветак на Плошчы Перамогі пракаментаваў апошнія падзеі.
Ён, напрыклад, сказаў, што КДБ напярэдадні прэс-канферэнцыі збеглага ў Беларусь польскага суддзі Томаша Шміта дакладваў яму аб сітуацыі. Лукашэнка даручыў праверыць гісторыю гэтага польскага грамадзяніна.
«Паглядзелі — гэта абсалютна нармальны, патрыятычны паляк. Нідзе калегі пра яго дрэнна не сказалі. Але гэта ўдар пад дых камусьці — уладам Польшчы. Вось яны і пачынаюць: здраднік, такі-сякі. Ніякі ён яе здраднік. Але ён рэальна глядзіць на рэчы, параўноўвае Польшчу і Беларусь і робіць высновы, — адзначыў Аляксандр Лукашэнка.
— Мы яго папярэдзілі: ты можаш даць прэс-канферэнцыю і іншае (яны ж забілі Чэчку), глядзі, ты ставіш сябе пад удар — «Я не баюся. Я павінен сказаць праўду, што адбываецца ў Польшчы». І гэта выклікала вельмі шырокі рэзананс».
Былы польскі вайсковец Эміль Чэчка збег у Беларусь у сярэдзіне снежня 2021 года, папрасіўшы палітычнага прытулку. Ён гэта тлумачыў, што «не згодны з палітыкай Польшчы адносна міграцыйнага крызісу». Ён таксама расказваў байкі пра нібыта дзясяткі, калі не сотні, расстраляных і закапаных польскімі вайскоўцамі мігрантаў. Беларуская прапаганда выкарыстоўвала заявы Чэчкі ў сваіх мэтах, ён стаў пастаянным госцем тэлеканалаў.
17 сакавіка 2022 года Эміль Чэчка быў знойдзены павешаным у мінскай кватэры. Яго пахавалі ў Даўгінаве Вілейскага раёна на могілках польскіх вайскоўцаў.
Варта зазначыць, што да заявы Лукашэнкі беларускія ўлады не каментавалі характар яго смерці. Аднак улады заснавалі «праваабарончую» прэмію яго імя, а ў Гродне назвалі ў ягоны гонар праезд.
Чытайце таксама:
Лукашэнка апраўдваўся перад вайскоўцамі за сваё «калдыбанне па завуголлях з Шайгу»
Лукашэнка з Пуціным засядзеліся — да трэцяй ночы абмяркоўвалі Украіну
