Большая частка дапамогі ад ЗША паступіць ва Украіну толькі летам
Пра сітуацыю з перадачай Украіне вайсковай дапамогі ад ЗША піша The New York Times.
Сістэма Patriot. Фота: Czarek Sokołowski / AP
28 красавіка Украіна атрымала першую партыю зброі ад ЗША з зацверджанага нядаўна пакета дапамогі. Гэта процітанкавыя ракеты, ракетныя снарады і 155-міліметровыя артылерыйскія снарады.
Другая партыя гэтай зброі і боепрыпасаў прыбыла 29 красавіка. А 30 красавіка ў Польшчу прыбыла новая партыя ракет-перахопнікаў Patriot з Іспаніі. Са слоў высокапастаўленага іспанскага чыноўніка, хутка яны будуць на ўкраінскім фронце.
За апошні тыдзень на склады NATO ў Еўропе прыбыла мноства самалётаў, цягнікоў і грузавікоў з боепрыпасамі і сістэмамі ўзбраення меншага памеру для адпраўкі Украіне.
Але, па словах афіцыйных асоб, на пастаўку зброі, абяцанай Злучанымі Штатамі, Вялікабрытаніяй і Германіяй, якія за апошнія тры тыдні абвясцілі аб новай буйной ваеннай падтрымцы, могуць сысці месяцы, перш чым яна паступіць у колькасці, дастатковай для ўмацавання абараназдольнасці Украіны на полі бою.
Гэта ставіць пад сумнеў здольнасць Украіны стрымліваць расійскія атакі, праз якія Кіеў ужо некалькі месяцаў знаходзіцца ў нявыгадным становішчы, піша выданне.
Са слоў высокапастаўленага амерыканскага чыноўніка, Расія працягне дамагацца нязначных поспехаў на ўсходзе і паўднёвым усходзе Украіны напярэдадні 9 мая, Дня Перамогі. Аднак украінскія вайскоўцы не пацерпяць поўнага краху на лініі фронту, нягледзячы на востры недахоп боепрыпасаў.
Тым не менш, аналітыкі ва ўрадзе ЗША і за яго межамі кажуць, што, імаверна, у лепшым выпадку наступіць лета, а ў горшым — канец года, перш чым Украіна зможа стабілізаваць свае пазіцыі на лініі фронту дзякуючы новаму ўліванню дапамогі.
Адзін амерыканскі чыноўнік адзначыў, што спатрэбіцца час, каб вырашыць, якія прадметы можна было б перадаць Украіне, не высільваючы падраздзяленні NATO, якія павінны быць баяздольнымі, напрыклад, тыя, якія выкарыстоўваюць баявыя машыны пяхоты Bradley і бронетранспарцёры Humvee, якія былі часткай амерыканскага пакета.
Іншыя віды ўзбраення, такія як 155-міліметровыя артылерыйскія снарады, у якіх адчайна мае патрэбу Украіна, знаходзяцца ў дэфіцыце ва ўсім свеце.
Чакаецца, што новая сістэма Patriot паступіць ва Украіну не раней за канец чэрвеня. Яе пастаўка можа супасці з пастаўкай іншай буйной сістэмы ўзбраення, у якой Украіна даўно мае патрэбу: знішчальнікаў F-16. Хоць Украіна запытвала вайсковыя самалёты амаль з самага пачатку вайны ў лютым 2022 года, чакаецца, што яны будуць пастаўленыя толькі гэтым летам — і спачатку ў невялікай колькасці.
Чытайце таксама:
Кулеба: Украіна можа пачаць перамовы з Расіяй пасля чэрвеньскай канферэнцыі ў Швейцарыі
Украіна ўжо атрымала заходнюю зброю з дазволам біць па Расіі — МЗС Латвіі
У Кіеве пачалі эвакуацыю дзвюх бальніц з-за выказвання Церцеля
