«Тую вайну перажыла, і гэтую перажываю». 98-гадовая ўкраінка прайшла 10 км, каб пазбегнуць акупацыі
Лідзія Сцяпанаўна з Ачарэціна, што ў Данецкай вобласці, прайшла каля 10 км пад абстрэламі, каб выйсці з акупацыі. Пра гэта расказала паліцыя Данецкай вобласці, паведамляе «BBC Украіна».
Фота: Facebook.com/ua.national.police
Бабуля ішла праз лінію фронту ўвесь дзень без ежы і вады, некалькі разоў падала, падымалася і зноў ішла.
«Як пахіснула мяне і кінула ў траву. Заснула. А тады зноў пайшла. Зноў упала, а тады ўстала. Думала, буду ісці паволі», — успамінае жанчына сваю доўгую дарогу ў інтэрв'ю, відэа якога апублікавала паліцыя.
Ісці ёй дапамагалі два кіі.
Фота: Facebook.com/ua.national.police
Пад вечар стомленую жанчыну на дарозе ўбачылі вайскоўцы і перадалі групе паліцыі «Белы анёл», якая праводзіць эвакуацыю цывільных асоб з прыфрантавых тэрыторый. Паліцыя не паведамляе, дзе менавіта гэта адбылося, але жанчыне ўдалося дабрацца да кантраляванай Украінай тэрыторыі.
Фота: Facebook.com/ua.national.police
Паліцыянты адвезлі бабулю ў прытулак, дзе яе пакармілі. Там яна зможа перадыхнуць і прабыць некаторы час.
Фота: Facebook.com/ua.national.police
Паліцыянты знайшлі сваякоў жанчыны. Незразумела, што адбылося і як яны згубіліся. Па яе словах, былі абстрэлы, і нявестка з сынам вырашылі бегчы. Але, падобна, што яны з Лідзіяй Сцяпанаўнай пайшлі рознымі дарогамі.
Фота: Facebook.com/ua.national.police
Дом Лідзіі Сцяпанаўны, які яна пабудавала сама, разбурылі расійскія абстрэлы.
«Там усё дагары нагамі. Там страшна, што робіцца… Прачнулася, а яны страляюць. Страшна», — кажа бабуля пра свой дом у Ачарэціне.
Фота: Facebook.com/ua.national.police
Пасля такога падарожжа Лідзія Сцяпанаўна, як выглядае, вельмі доўга не магла прыйсці да свядомасці. Яна з жахам расказвае пра ўсё перажытае.
«Я тую вайну перажыла, і гэтую вайну перажываю. Засталася без нічога. Дамы гараць, дрэвы павырывала з каранямі», — кажа яна.
Па жанчыну абяцала прыехаць унучка.
Чытайце таксама:
Расійскія войскі занялі Сямёнаўку на аўдзееўскім кірунку
Расіяне здзейснілі прарыў у Данецкай вобласці, захапіўшы Ачарэціна
Расійскія войскі прарвалі ўкраінскі фронт на паўночны захад ад Аўдзееўкі — Bild
