Ва Украіне шукаюць бацьку і сына, якія расстралялі паліцэйскага
Паліцэйскі папрасіў іх паказаць, што ў багажніку.
Фота з месца здарэння. Крыніца: старонка паліцыі Вінніцкай вобласці Украіны ў фэйсбуку
Як паведамляе паліцыя Вінніцкай вобласці Украіны, сёння каля 2-й гадзіны ночы ў Гайсінскім раёне Вінніцкай вобласці нарад паліцыі спыніў на трасе Suzuki Grand Vitara.
У машыне знаходзіліся двое мужчын. Мяркуючы па відэа, нападнікі перавозілі нешта забароненае ў скрынях у багажніку. Паліцэйскія папрасілі іх адкрыць, пасля чаго на іх здзейснілі напад.
Інспектар паліцыі 20-гадовы Максім Зарэцкі памёр ад атрыманых цялесных пашкоджанняў, а яго напарнік паранены. Паліцыя паказала фота з месца страляніны.
Паліцэйскі Максім Зарэцкі загінуў. Фота: старонка паліцыі Вінніцкай вобласці Украіны ў фэйсбуку
Аператыўнікам атрымалася вызначыць асобаў, якія маюць дачыненне да злачынства. Гэта ўраджэнцы Пішчанскага раёна Вінніцкай вобласці бацька (1972 года нараджэння) і сын (1998 года нараджэння) Васілакі. Апошні, як паведамляецца, праходзіць вайсковую службу.
Бацька і сын Васілакі, якіх падазраюць у забойстве паліцэйскага. Фота: insiderUKR / Telegram
Шэраг украінскіх тэлеграм-каналаў апублікавалі відэа з верагоднымі падазраванымі. Яны засвяціліся на адной з АЗС паблізу месца злачынства. На кадрах бачна, што кіроўца быў апрануты ў вайсковую форму. Яго пасажыр апрануты ў спецадзенне чорнага колеру, якое носяць некаторыя сілавыя структуры.
Кадр відазапісу камеры назірання АЗС. Фота: insiderUKR / Telegram
Цяпер паліцыя спрабуе вызначыць месцазнаходжанне і затрымаць падазраваных. На тэрыторыі Вінніцкай і Адэскай абласцей уведзена паліцэйская аперацыя.
Чытайце таксама:
Выкрадзенага ў «ДНР» амерыканскага ваенкара Расэла Бэнтлі забілі
«Выпалім жалезам». Туск паведаміў, што напад на паплечніка Навальнага заказаў беларус
Расійскі вайсковец згвалціў уцякачку з Украіны. Яна нарадзіла дзіця і пакінула яго ў смеццевым баку
У Оршы бацька ледзь не задушыў дачку, якая папрасіла яго выключыць гук на тэлефоне
