У самым цэнтры Навагрудка прадаюць гатэль са 150-гадовай гісторыяй
Аб'ява наконт продажу будынка ў гістарычным цэнтры Навагрудка з'явілася на сайце аднаго з гродзенскіх агенцтваў нерухомасці, піша «Вячэрні Гродна».
Гэта гістарычны будынак гасцінічна-рэстараннага комплексу з кацельняй ў цэнтры горада.
Будынак былой гасцініцы «Еўропа» размешчаны на цэнтральнай плошчы і скрыжаванні турыстычных шляхоў паміж папулярнымі аб'ектамі горада: Навагрудскі замак, Замкавая гара, касцёл Перамянення Гасподняга, Касцёл святога архангела Міхаіла, Барысаглебская царква і г.д. Маршруты штогадовых велагонак праходзяць каля гатэля: Навагрудак — Мір — Нясвіж.
Год пабудовы 1880 год. Плошча — 814 «квадратаў». Вонкавыя, унутраныя сцены і перагародкі пабудаваныя з керамічнай цэглы. Вокны і ўваходныя дзверы — гэта дубовыя шклопакеты.
З інжынерных камунікацый ёсць ацяпленне — газавы кацёл, халоднае водазабеспячэнне — цэнтралізаваная сістэма, гарачае водазабеспячэнне — газавы кацёл; электразабеспячэнне: цэнтралізаваная сістэма, 220В, 380В, 28кВт, ёсць тэхнічныя ўмовы на павелічэнне магутнасці да 250 кВт; газазабеспячэнне: цэнтралізаваная сістэма; вентыляцыя, праводка пад відэаназіранне.
На першым паверсе размешчаны тры двухмесныя нумары, на другім паверсе пяць двухмесных нумароў, на цокальным паверсе рэстаран прыкладна на 100 пасадачных месцаў.
