Звольнілі мастацкага кіраўніка ў яшчэ адным беларускім тэатры
Пра звальненне мастацкага кіраўніка Віцебскага тэатра «Лялька» Віктара Клімчука даведалася «Люстэрка» ад дзвюх не звязаных паміж сабой крыніц.
Віктар Клімчук. Фота: lialka.by
На сайце тэатра старонка, прысвечаная Клімчуку, яшчэ не выдаленая, аднак, паводле інфармацыі «Люстэрка», звальненне адбылося яшчэ некалькі дзён таму.
Клімчука нібыта абвінавацілі ў невыкананні планаў, якія стаяць перад тэатрам. Хоць увогуле за гэтую задачу нясе адказнасць не мастацкі кіраўнік, а дырэктар калектыву. Аднак Клімчуку вынеслі вымову, што ўрэшце і прывяло да яго звальнення.
Віктар Клімчук нарадзіўся ў 1946 годзе на Брэстчыне, атрымаў адукацыю як акцёр, а затым як рэжысёр, у савецкі час працаваў у гарадах Расіі і Украіны.
«Выпадкова пачуў, што ў Беларусі ў Віцебску збіраюцца адкрываць тэатр. А я нарадзіўся на Брэстчыне, пацягнула ў родныя мясціны. Напісаў ліст у абласное ўпраўленне культуры і атрымаў адказ, што пакуль тэатр лялек не збіраюцца адкрываць, але Коласаўскі думае пра стварэнне лялечнай трупы. Я звязаўся з кіраўніцтвам і высветліў, што сапраўды патрэбны рэжысёр-лялечнік. Так я апынуўся ў горадзе на Дзвіне», — расказваў ён сам у інтэрв'ю.
Гэта адбылося ў 1985 годзе. Тады пры драматычным тэатры імя Якуба Коласа была створана лялечная трупа. У 1986 годзе быў сыграны першы спектакль — «Дзед і жораў» па п'есе Віталя Вольскага. У 1990-м трупа атрымала незалежнасць. Так узнік Беларускі тэатр «Лялька». Клімчук стаў першым мастацкім кіраўніком калектыву і заставаўся на гэтай пасадзе да гэтага часу.
Клімчук з'яўляецца заслужаным дзеячам мастацтваў Рэспублікі Беларусь, Чалавекам года Віцебшчыны — 2011, ягоны калектыў быў неаднаразова адзначаны дыпломамі на прэстыжных міжнародных фестывалях.
Цяпер у Беларусі засталося ўсяго чатыры тэатры — «Лялька», Купалаўскі, Коласаўскі (апошні працуе ў Віцебску), а таксама Рэспубліканскі тэатр беларускай драматургіі — якія паказваюць усе свае спектаклі на беларускай мове.
Чытайце таксама:
У мінскім Купалаўскім нарэшце прэм’ера па беларускамоўным творы — першая з часоў Латушкі
Дырэктара Музычнага тэатра, дзе сыгралі «Перамен», усё ж звольнілі
На сёлетнім «Славянскім базары» пакажуць беларускамоўнага «Гамлета». Але ставіць будзе расеец
