Колькі калійных угнаенняў летась вырабіла і экспартавала Беларусь
Вось якія ацэнкі даюць аглядальнікі рынку і асноўныя канкурэнты «Беларуськалія».
Вытворчасць калійных угнаенняў у Беларусі за 2023 год скарацілася да 3,8 млн тон супраць 4 млн тон у 2022-м. Такія даныя змяшчае агляд мінеральных сыравінных тавараў, падрыхтаваны Нацыянальным інфармацыйным цэнтрам карысных выкапняў ЗША (USGS).
На справаздачу звярнуў увагу Office Life.
У ёй гаворыцца, што Беларусь перайшла на экспарт калію па чыгунцы ў Кітай і з партоў Расіі. Пры гэтым пастаўкі на знешнія рынкі заставаліся значна ніжэйшыя за ўзровень да 2022 года, калі краіна была адным з вядучых экспарцёраў.
Сусветная вытворчасць калійных угнаенняў летась знізілася праз тое, што вытворцы скарацілі запасы на фоне нявызначанасці паставак праз эканамічныя санкцыі ў дачыненні да Беларусі і Расіі, што прывяло да росту цэн у першай палове 2022 года.
Паводле ацэнак USGS, сусветныя цэны на калійныя ўгнаенні пачалі падаць у другой палове 2022 года. Тады запасы павялічыліся, і гэтая тэндэнцыя захавалася і ў 2023 годзе.
Вытворчасць у Канадзе знізілася збольшага з-за забастоўкі докераў у ліпені 2023 года, якая прывяла да скарачэння паставак калійных угнаенняў з порта Ванкувер. Гэта прывяло да часовага закрыцця некаторых шахт у Канадзе. Здабыча на іх аднавілася пасля спынення забастоўкі ў жніўні.
Сусветнае спажыванне калію ў складзе ўгнаенняў вырасла з 35,7 млн тон у 2022 годзе да 37,1 млн тон у 2023-м. Азія і Паўднёвая Амерыка застаюцца вядучымі рэгіёнамі па спажыванні калію.
Паводле прагнозаў, сусветныя штогадовыя магутнасці па вытворчасці калійных угнаенняў вырастуць з 64,3 млн тон калію (K2O) у 2023 годзе прыкладна да 67,6 млн тон да 2026-га. Большая частка прыросту будзе забяспечана за кошт новых руднікоў і праектаў пашырэння ў Лаосе і Расіі. Новыя руднікі ў Беларусі, Бразіліі, Канадзе, Эфіопіі, Марока, Іспаніі і ЗША планавалася ўвесці ў эксплуатацыю пасля 2026 года.
Паводле ацэнак, сусветныя запасы калію складаюць каля 250 млрд тон. Аб'ём гэтых рэсурсаў, у прыватнасці запасы Кітая, Лаоса і Расіі, USGS перагледзеў на аснове справаздач урада.
Раней Нацыянальны інфармацыйны цэнтр карысных выкапняў ЗША паведамляў, што ў 2022 годзе здабыча калію ў Беларусі скарацілася на 60%, да 3 млн тон. Цяпер ацэнка 2022 года павялічаная да 4 млн тон.
Канкурэнты «Беларуськалія» — канадская Nutrien і амерыканская Mosaic Company — лічаць, што пастаўкі беларускага калію на сусветны рынак у 2023 годзе маглі скласці 5-6 млн тон.
Паводле прагнозу беларускага ўрада, Беларусь да 2025 года павінна вырабляць 16-17 млн тон калійных угнаенняў у год.
Чытайце таксама:
Кіраўнікі «Беларуськалія» пайшлі на выбары і апублікавалі дэкларацыі. Якія ў іх заробкі?
Трэнды ў беларускай эканоміцы, якія будуць у 2024 годзе
«Беларуськалій» хоча адсудзіць у Літвы мільярд даляраў за забарону перавозкі калійных угнаенняў
Алейнік: Турцыя гатова садзейнічаць зняццю санкцый супраць беларускіх калійных угнаенняў
Сусветныя цэны на калійныя ўгнаенні вярнуліся на перадваенны ўзровень
