У Расіі прадалі на аўкцыёне старажытную грамату аб наданні герба беларускай Дзісне
Грамата караля польскага і вялікага князя літоўскага Жыгімонта Аўгуста аб наданні гораду Дзісна герба была прададзена на аўкцыёне ў Расіі, вынікае з інфармацыі на сайце аўкцыённага дома «Літфонд», піша Sputnik.
Фота: Аўкцыённы дом «Літфонд» / Ivan Filimonov
Гістарычны дакумент быў падпісаны 28 лютага 1567 года ў Кнышыне. Пісар Міхал Гарабурда склаў тэкст на старабеларускай мове і напісаў яго кірылічным скорапісам.
На ўнікальным гістарычным дакуменце ў золаце і фарбах відаць буйная рукапісная выява герба, які ўяўляў сабой гарадскую сцяну з трыма вежамі.
«Даем тому месту Дисненскому герб три вежи з муру, который герб и на сем листе нашом вымалевать есьмо казали», — гаворыцца ў грамаце.
Фота: Аўкцыённы дом «Літфонд» / Ivan Filimonov
Тэкст граматы вядомы даследчыкам, бо быў выдадзены ў 13-м томе «Актаў Віленскай археаграфічнай камісіі» ў 1886 годзе. Тады аўтары публікацыі спасылаліся на копію дакумента XVIII стагоддзя, а сам арыгінал граматы захоўваўся ў Віленскім магістраце.
Аўкцыён, на якім грамата была прададзеная за 750 тысяч расійскіх рублёў (каля 8,5 тысячы даляраў), адбыўся 16 лістапада. Звесткі пра прадаўца і пакупніка «Літфонд» не апублікаваў. Пячатка на дакуменце сведчыць, што, верагодна, грамата знаходзілася ў бібліятэцы роду Тышкевічаў.
Таксама ў дзень аўкцыёну былі прададзеныя яшчэ два дакументы з архіва Тышкевічаў, звязаныя з беларускай гісторыяй. Так, за 550 тысяч расійскіх рублёў прадалі грамату вялікага князя літоўскага і караля польскага Жыгімонта III Якаву Мілеўскаму на землі ў Віленскім ваяводстве, а таксама грамату вялікай княгіні літоўскай і каралевы польскай Боны Сфорцы манастыру святых пакутнікаў Барыса і Глеба ў Гродне.
Чытайце таксама:
«У нас былі свае актобарфэсты». Айцішнік з Гомеля аднаўляе рэцэпты старадаўняга беларускага піва
