Улады Літвы папярэдзілі сваіх грамадзян пра актывізацыю на мяжы лукашэнкаўскіх спецслужбаў
Беларускія спецслужбы актыўна дапытваюць грамадзян Літвы, якія едуць у Беларусь, на памежных пераходах, правяраючы іх камп'ютары і мабільныя тэлефоны, а таксама кантакты, акаўнты ў сацыяльных сетках, фатаграфіі і картаграфічныя маршруты, як папярэдзіў Дэпартамент дзяржаўнай бяспекі Літвы.
Здымак ілюстрацыйны. Фота з сацыяльных сетак
Як адзначылі ў ведамстве, спецслужбы Лукашэнкі збіраюць інфармацыю пра палітычную прыналежнасць і месца працы літоўскіх грамадзян, а таксама спрабуюць знайсці сувязі з памежнікамі, праваахоўнікамі і выведнікамі, як паведамляе LRT.
Дэпартаменту вядома пра выпадкі, калі грамадзянам Літвы забаранялі ўезд у Беларусь пасля таго, як выяўлялася, што яны падтрымліваюць Украіну і асуджаюць расійскую агрэсію. Адзначаецца, што грамадзян Літвы падчас допытаў падвяргалі шантажу і псіхалагічнаму ціску, сцвярджаючы, што забарона на ўезд у Беларусь будзе знятая, калі яны пагодзяцца супрацоўнічаць з лукашэнкаўскімі спецслужбамі.
У Дэпартаменце папярэджваюць, што спецслужбы могуць выкарыстоўваць інфармацыю з асабістых камп'ютараў і мабільных прылад не толькі супраць уладальніка, але і супраць яго сямейнікаў, сваякоў або калег з мэтай іх кампраметацыі і вярбоўкі, асабліва калі яны наведваюць Беларусь ці Расію.
Усіх грамадзян, якіх дапытвалі на літоўска-беларускай мяжы або правяралі іх мабільныя тэлефоны/камп'ютары спецслужбы рэжыму Лукашэнкі, заклікалі паведаміць пра гэта МЗС Літвы. Дэпартамент таксама заклікае не наведваць Расію і Беларусь.
Чытайце таксама:
Працягваюцца затрыманні на межах пры ўездзе ў Беларусь
У КДБ расказалі, дзе рыхтуюць добраахвотнікаў для вызвалення Беларусі
NATO давядзецца ўмацаваць усходнюю мяжу, калі Прыгожын апынецца ў Беларусі — прэзідэнт Літвы
