Зяленскі агучыў, калі можа наступіць пераломны момант у наступленні
Зімовы перыяд можа стаць пераломным момантам у вызваленні ўкраінскіх тэрыторый, акупаваных Расіяй, але для гэтага ўкраінскай арміі патрабуецца сістэматычная пастаўка неабходных відаў узбраення. Пра гэта сказаў прэзідэнт Уладзімір Зяленскі падчас удзелу ў панэльнай дыскусіі на 17-й сустрэчы Ялцінскай еўрапейскай стратэгіі «Украіна на абароне нашай агульнай свабоды» (YES).
Фота: Офіс прэзідэнта Украіны
«Я лічу, што гэтая зіма — пераломная, і яна можа прывесці да хуткай дэакупацыі Украіны. Мы бачым, як яны [расійскія салдаты] бягуць на некаторых напрамках. Былі б мы крыху мацнейшыя зброяй, мы б дэакупавалі хутчэй», — цытуе Зяленскага яго Офіс.
90 дзён будучай зімы вырашаць больш, чым 30 гадоў незалежнасці Украіны, мяркуе ён.
Ён адзначыў, што з пачатку вайны ўкраінскае грамадства аб'ядналася ў барацьбе супраць ворага і пераасэнсавала сваё стаўленне да Радзімы і роднай зямлі.
«Усе сталі адной прафесіі. Гэтая прафесія — украінец, змест прафесіі — выжыць. Так што гэта галоўная наша контратака», — сказаў Уладзімір Зяленскі.
Прэзідэнт Украіны падкрэсліў, што ў іх няма іншага выйсця, чым перамагчы агрэсара ў гэтай вайне.
«Усе мы дакладна верым у перамогу больш, чым яны, і гэта галоўнае. Галоўная наша зброя — што мы верым, ведаем, адчуваем перамогу», — рэзюмаваў Зяленскі.
Ён таксама адзначыў, што Украіна можа павялічыць экспарт электраэнергіі:
«Мы ўжо экспартуем электрычнасць нашым суседзям, якая дапамагае замяшчаць брудныя расійскія энергарэсурсы, і лёгка можам павялічыць экспарт як мінімум да двух з паловай гігават, а потым яшчэ больш…. Але для гэтага трэба, каб расійскія вайскоўцы сышлі з тэрыторыі Запарожскай АЭС. Гэта фундаментальны еўрапейскі інтарэс цяпер, перад зімой».
