Караеў расказаў, чаму адмяніў масавыя праверкі супрацоўнікаў на паліграфе
Міністр унутраных спраў Юрый Караеў у эфіры БТ-1 распавёў, чаму адмяніў пагалоўныя праверкі супрацоўнікаў на паліграфе.
«Не зусім дасканалая гэтая сістэма, калі толькі паліграфічнае псіхафізіялагічнае даследаванне закрывае чалавеку дарогу для працягу службы. Сапраўды, я адмяніў пагалоўнае, татальнае праходжанне ўсімі супрацоўнікамі паліграфа, таму што чалавек можа і хвалявацца, і не вытрымліваць доўга замкнёнай прасторы», — сказаў Юрый Караеў.
На яго думку, характарыстыка на супрацоўніка з боку начальніка і калектыву важнейшая, чым вывад паліграфіста, які ўжо загадзя, з прадузятасцю спрабуе яго ў чымсьці выкрыць. Да таго ж даследаванне не зусім дакладнае, ёсць працэнт хібнасці.
«Я прыняў такое рашэнне, хоць свядома разумею, што нечым паграшу супраць уласнай бяспекі ў нашых радах, дзесьці можа і пройдуць такія, каго і варта было прыпыніць на службе», — адзначыў міністр. Ён дадаў, што паліграф дапамагае нешта высветліць, але не з'яўляецца панацэяй.
