Лукашэнка назваў візіт Болтана ў Мінск гістарычным: Такіх фігур не было даўно
Фота БелТА
Аляксандр Лукашэнка прапанаваў дарадцы прэзідэнта ЗША па нацыянальнай бяспецы Джону Болтану адкрыта і па-сяброўску абмеркаваць пытанні беларуска-амерыканскіх адносін, перадае БЕЛТА.
Кіраўнік дзяржавы падкрэсліў, што ў бакоў ужо ёсць пэўная гісторыя перазагрузкі двухбаковых адносінаў.
«Я прапанаваў бы абмеркаваць адкрыта, нават па-сяброўску ўсе пытанні нашых адносін. Хай яны будуць непрыемнымі для Беларусі, але вы павінны іх пазначыць. Я таксама адкрыта і сумленна пазначу тыя пытанні, якія лічу патрэбным абазначыць перад вамі для далейшага нашага супрацоўніцтва, у тым ліку якія, можа быць, не вельмі прыемныя будуць для ЗША. Гэта дазволіць стварыць нам тую базу адносін на будучыню, якая павінна быць паміж намі», — заявіў Аляксандр Лукашэнка.
«Нягледзячы на ўсю шуміху, якая адбываецца вакол вашай паездкі, тут шмат станоўчага, асабліва для Беларусі. Дадатнае заключаецца ў тым, і нас ніхто ў гэтым не папракне (і вы, напэўна, ведаеце пра гэта), што мы ўвесь час з моманту пагаршэння нашых стасункаў з ЗША прапаноўвалі закрыць гэтую нядобрую старонку і пачаць з новага ліста нашы адносіны», — падкрэсліў кіраўнік дзяржавы.
Аляксандр Лукашэнка адзначыў, што візіт Джона Болтана ў Беларусь з'яўляецца гістарычным: «Такіх прыкметных высокапастаўленых фігур (з ЗША) у Беларусі не было даўно. І ў гэтым таксама гістарычнасць гэтага візіту».
Акрамя таго, да гэтага візіту ў Беларусі пабывалі многія эксперты і спецыялісты з ЗША. «Я асабіста зь імі сустракаўся, вёў размовы на розныя тэмы нашых узаемаадносін. І гэта сведчыць пра тое, што ў нас ёсць некаторая гісторыя перазагрузкі адносінаў», — адзначыў беларускі лідар.
