Sim-karty tolki ad MTS i nijakaha mabilnaha internetu. Na «Hrodna Azocie» zabaraniajuć smartfony
Na «Hrodna Azocie» i pradpryjemstvach, u jakich jon vystupaje zasnavalnikam, supracoŭnikam nieŭzabavie zabaroniać karystacca smartfonami i vychodzić u internet. Dakumient, padpisany hiendyrektaram Iharam Lašenkam, trapiŭ u rasparadžeńnie «Lusterka». U dakumiencie — zahad vydać usim supracoŭnikam, miarkujučy pa ŭsim, knopkavyja telefony i karparatyŭnyja sim-karty — na terytoryju pradpryjemstva možna budzie prachodzić tolki ź imi.
«Hrodna Azot». Fota: delo.by
Rabotnikam — novyja hadžety. Buchhałteryi i słužbie biaśpieki — śpisy proźviščaŭ i zajavy
U dakumiencie, jaki atrymała ŭ svajo rasparadžeńnie redakcyja «Lusterka», paznačana, što rabotnikaŭ «Hrodna Azota» z 1 lipienia 2024 hoda nie buduć prapuskać na terytoryju sa smartfonami, u jakich jość vychad u internet. U pracoŭny čas supracoŭnikam budzie dazvolena karystacca telefonami, pa jakich možna telefanavać, pieradavać SMS i MMS — vierahodna, havorka pra knopkavyja telefony. Vyklučeńnie zrabili tolki dla asobnaj hrupy supracoŭnikaŭ, ale pra heta paźniej.
Zahad padpisany hiendyrektaram «Hrodna Azota» Iharam Lašenkam i vypuščany 26 krasavika. Tekst jaho skłali pa pratakole «pašyranaj vytvorčaj narady», jakuju pravodzili 17 krasavika — mienavita ŭ toj dzień «Kibierpartyzany» paviedamlali pra maštabnuju ataku na pradpryjemstva.
Jak adznačana ŭ dakumiencie, miery prymajucca dla abmiežavańnia mahčymaści supracoŭnikami «fotavideafiksacyi i vykarystańnia internet-resursaŭ». A taksama «ŭ metach zabieśpiačeńnia bieśpierabojnaj pracy strukturnych padraździaleńniaŭ, apieratyŭnaha pryniaćcia rabotnikami pradpryjemstva rašeńniaŭ pa napramkach vytvorča-finansavaj dziejnaści».
Treciaja (apošniaja) staronka zahadu ab zabaronie vykarystańnia smartfonami na terytoryi «Hrodna Azota», jaki atrymała ŭ svajo rasparadžeńnie «Lusterka»
Pa novych normach usim strukturnym padraździaleńniam pavinny sa składa vydać mabilnyja telefony «standartu 2G». U dakumiencie nie paznačajecca, ci moža być u hadžetach kamiera dla zdymki fota i videa, ale raźmierkavać ich pavinny byli da 29 krasavika.
Papiarednie kiraŭnikam hetych padraździaleńniaŭ treba było skłaści śpisy supracoŭnikaŭ, ad kožnaha rabotnika — abaviazkova aformić zajavu i abaviazacielstvy pa vykarystańni. Aryhinały śpisaŭ i zajavy da 3 maja čakali ŭ buchhałteryi, kopii — dadatkova ŭ słužbie biaśpieki i cechu suviazi.
Adznačajecca, što kali ŭ supracoŭnikaŭ źjaŭlajecca «vytvorčaja nieabchodnaść padklučycca da internetu sa smartfonaŭ», śpis ich proźviščaŭ u dakładnoj zapiscy pavinny nakiravać načalniku słužby biaśpieki. Pryčym papiarednie heta treba ŭzhadnić z namieśnikam hiendyrektara padraździaleńnia, da jakoha hetyja rabotniki adnosiacca.
Da telefonaŭ prykładajucca karparatyŭnyja sim-karty — ich padklučyli da apieratara MTS, na taryf «Razumny biznes 1.0». Pry hetym «Hrodna Azot» atrymała vialikuju źnižku — 70% ad dziejnaha taryfu. Charakterna, što jon praduhledžvaje i 250 MB internet-trafiku, ale dla hrodnaazotaŭcaŭ jon budzie zabłakavany.
Darečy, 17 krasavika hiendyrektaram MTS staŭ eks-načalnik KDB pa Minsku i vobłaści Uładzimir Kozyr.
Dadatak da zahadu ab zabaronie karystacca smartfonami na terytoryi «Hrodna Azota», jaki pastupiŭ u rasparadžeńnie «Lusterka»
Pry hetym absalutna ŭsim supracoŭnikam dazvalajuć ustavić u telefon inšuju, svaju sim-kartu — kali jość takaja mahčymaść.
Usie patrabavańni tyčacca jak samoha «Hrodna Azota», tak i filijała «Zavod Chimvałakno», unitarnych pradpryjemstvaŭ «AzotŚpiecTrans», «Azotservis», «Azotchimfartys», «Azot Rem Bud». Ich dyrektaram taksama zahadvajecca kupić i razdać rabotnikam telefony i simki. Dedłajn — 30 červienia.
Asobnym punktam u zahadzie prapisany śpis supracoŭnikaŭ, jakim takija telefony taksama vydaduć, ale dazvolać karystacca svaimi asabistymi smartfonami. Ich nie tak šmat — heta namieśniki hiendyrektara «Hrodna Azota» i «Zavoda Chimvałakno», kiraŭniki strukturnych padraździaleńniaŭ (słužbaŭ, atradaŭ i adździełaŭ) i ich namieśniki. Sam hiendyrektar u hetym śpisie nie značycca, ale, vierahodna, na jaho zabarona taksama nie budzie raspaŭsiudžvacca.
Zabarona sapraŭdy?
Tak. «Lusterku» hetuju infarmacyju paćvierdzili ŭ daviedačnym biuro «Hrodna Azota», kudy žurnalistka redakcyi patelefanavała jak supracoŭnica i paprasiła ŭdakładnić, kali mienavita zabarona pačnie dziejničać.
«Pakul nie było nijakich ukazańniaŭ. U mianie, naprykład, pakul svoj telefon z saboj, siońnia dakładna, — adkazaŭ supracoŭnik i ŭdakładniŭ infarmacyju ŭ kalehaŭ. — Papiarednie, pakul da 1 červienia možacie karystacca».
Paśla smartfony rabotnikam pryjdziecca pakidać u śpiecyjalnych jačejkach na prachadnych. Pa słovach surazmoŭcy, kožnaja jačejka budzie raźličanaja prykładna na čatyry čałavieki. Jačejki «pad kamierami» i buduć zakryvacca na kluč.
Čym «Kibierpartyzany» tak napałochali kiraŭnictva «Hrodna Azota»?
17 krasavika chakiery abjavili pra maštabnuju ataku na «Hrodna Azot». Abjadnańnie zajaviła, što byli ŭzłamanyja sistemy achovy i kamiery videanazirańnia, parušanaja praca kacielnaha cecha. Taksama źniščanyja bekapy baz danych.
«Staŭki pavyšajucca. Kab adnavić danyja, pryjdziecca dyktataru vyzvalić usich palitviaźniaŭ «Hrodna Azota» + 75 palitviaźniaŭ z najhoršym stanam zdaroŭja (na naša mierkavańnie)», — zajavili «Kibierpartyzany».
Na samim chimičnym pradpryjemstvie situacyju nie kamientavali. Pry hetym na «Hrodna Azocie» ŭ vytvorčaści zadziejničanyja ŭ tym liku vybuchovaniebiaśpiečnyja rečyvy.
3 traŭnia chakiery zajavili pra paŭtornuju ataku na «Hrodna Azot». Jany śćviardžajuć, što padčas pieršaj u sietku pradpryjemstva byli zakładzienyja virusy, jakija spracoŭvajuć pa raskładzie.
«Adpracavała pieršaja sieryja takich «zakładak», jakaja pavinna była vydalić danyja mnohich sotniaŭ PK supracoŭnikaŭ, dakumientaabarot, damien-kantralory i inšyja sierviery. Pavodle našaj infarmacyi, na pradpryjemstvie panika. Dyśpietčar addaŭ zahad terminova vyklučyć kampjutary pa ŭsim pradpryjemstvie», — havaryłasia ŭ paviedamleńni «Kibierpartyzan».
Abjadnańnie nahadała, što vydalić usie «zakładki», kali pradpryjemstva i ŭłady vykanajuć zajaŭlenyja patrabavańni.
Sajt chimpradpryjemstva, jaki raniej byŭ niedastupny, ciapier znoŭ pracuje.
Čytajcie taksama:
«Na pradpryjemstvie panika». «Kibierpartyzany» zajavili pra novuju ataku na «Hrodna Azot»
«Učora byŭ šuchier». Što adbyvajecca na «Hrodna Azocie» paśla ataki «Kibierpartyzanaŭ»
«Kibierpartyzany» paviedamili pra ataku na hrodzienski «Azot»
