Čamu Si Czińpin pačaŭ svoj vizit u Jeŭropu z Francyi i jak jaho sustreŭ Makron
Si Czińpin pryjechaŭ u Jeŭropu ź niezvyčajnym vizitam i ŭ niezvyčajny čas, kali adnosiny pamiž Zachadam i Kitajem imkliva paharšajucca, piša BBC.
Prezident Francyi Emanuel Makron vitaje prezidenta Kitaja Si Czińpina pierad ich sustrečaj u Jelisiejskim pałacy ŭ paniadziełak, 6 maja 2024 h. u Paryžy. Fota: AP Photo/Christophe Ena
Čamu razładzilisia adnosiny Jeŭropy i Kitaja?
Analityki adznačajuć, što na paharšeńnie adnosin pamiž Jeŭropaj i Kitajem upłyvajuć try pryčyny — handal, biaśpieka i vajna va Ukrainie.
U handli Jeŭropa spadziavałasia na toje, što Kitaj pačnie nabyvać zachodnija tavary, adkryje svoj rynak dla zachodnich vytvorcaŭ i asłabić kantrol za rucham kapitału.
Ale Kitaj nasupierak čakańniam u paślakavidny čas zrabiŭ staŭku na pramysłovy ryvok u novych technałohijach u takich halinach, jak elektramabili, soniečnyja batarei i inšyja tavary i ciapier źjaŭlajecca surjoznym kankurentam dla jeŭrapiejskich i amierykanskich vytvorcaŭ.
U vyniku spačatku ZŠA, a ciapier i Jeŭropa pravodziać antymanapolnyja rasśledavańni, vynikam jakich moža stać uviadzieńnie zboraŭ na kitajskija elektramabili i miedycynskaje abstalavańnie. U adkaz Kitaj pahražaje spynić impart francuzskaha kańjaku.
Pieraściarohi adnosna pahrozy dla biaśpieki Jeŭropy z boku Kitaja pryviali da taho, što krainy ES pastupova zharnuli zakupku kitajskaha telekamunikacyjnaha abstalavańnia, a ŭ apošnija dni pierad vizitam Si zahavaryli ab zabaronie kitajskaj sacsietki TikTok i pačali aktyŭna łavić kitajskich špijonaŭ.
Čamu Si abraŭ Francyju?
VVS źviartaje ŭvahu, što dla pačatku svajho piacidzionnaha vizitu ŭ Jeŭropu kitajski lidar abraŭ nie Brusel — stalicu Jeŭrasajuzu, — a Francyju.
Vybar analityki tłumačać tym, što lidar hetaj jeŭrapiejskaj jadziernaj dziaržavy moža być supastaŭny svajoj palityčnaj vahoju ź Si. Akramia hetaha Makron hatovy iści na kampramisy i moža krytykavać ZŠA.
Što tyčycca pieramovaŭ, to Kitaj hatovy abmiarkoŭvać pytańni handlu, a voś dyjałoh u abmierkavańni pytańnia vajny Rasii suprać Ukrainy daŭno nie załadziŭsia.
U minułym hodzie Makron byŭ u haściach u Si i paprasiŭ jaho nacisnuć na Pucina, kab «pryvieści Rasiju ŭ pačućci», ale kitajski lidar heta praihnaravaŭ. Ciapier u Paryžy Makron pasprabuje paŭtaryć svaju prośbu. Ale ekśpierty sumniavajucca, što heta budzie mieć vynik, bo Si Czińpin hladzić na śviet praz pryzmu supraćstajańnia z ZŠA. Pry hetym inšyja krainy Zachadu jon nie ličyć samastojnymi.
Uśled za Pucinym Si nazyvaje vajnu nie vajnoju, a «kryzisam» i Makron u svaim vystupleńni ŭ hety paniadziełak dypłamatyčna pieraniaŭ hetuju terminałohiju.
Francuzski prezident prapanavaŭ abmierkavać pytańni jeŭrapiejska-kitajskaha handlu i «dva bujnyja kryzisy» — Ukrainu i Blizki Uschod.
Jak zaŭvažaje VVS, u svaim vystupie Makron nie staŭ padvodzić vyniki sustrečy, bo jamu jašče paŭtara dnia zabaŭlać kitajskaha lidara. Paniadziełak, 6 maja, dva lidary praviali ŭ stalicy Francyi, a na aŭtorak zapłanavana pajezdka ŭ hory. Makron i Czińpin padymucca na vyšyniu 2000 mietraŭ nad uzroŭniem mora ŭ miascovaści Kol diu Turmale ŭ Piryniejach, kudy francuzski prezident u dziacinstvie pryjazdžaŭ da babuli.
Rolu «złosnaha palicejskaha» vykanała staršynia Jeŭrakamisii Ursuła fon der Lajen. U svaim vystupie jana nazvała vajnu vajnoju i zajaviła, što raźličvaje na toje, što Kitaj vykarystaje ŭvieś svoj upłyŭ na Rasiju, kab pakłaści joj kaniec, ustrymajecca ad pastavak uzbrajeńnia i pradukcyi dvajnoha pryznačeńnia Rasii i pierastanie dapamahać Rasii abychodzić sankcyi.
Čytajcie taksama:
Si Czińpin upieršyniu za piać hadoŭ adpraŭlajecca ŭ turne pa jeŭrapiejskich krainach
