Kadyraŭ pryhraziŭ Sabčak, kab «nie čapała» jaho siamju, i patłumačyŭ vychadku svajho syna ŭ SIZA
Kiraŭnik Čačni Ramzan Kadyraŭ patelefanavaŭ błohiercy Ksienii Sabčak, kab rastłumačyć joj pavodziny svajho 15-hadovaha syna Adama ŭ SIZA i «papiaredzić» ab nastupstvach aśviatleńnia žyćcia jaho siamji. Ab hetym Sabčak 15 vieraśnia padrabiazna napisała ŭ telehram-kanale.
Ramzan Kadyraŭ sa svaim 15-hadovym synam Adamam, jaki źbivaŭ na videa zatrymanaha rasijania ŭ SIZA. Kałaž: Naša Niva
Sabčak piša, što zapisać razmovu joj nie było čym, tamu jana pierakazvaje.
Pa słovach błohierki, razmova išła pa videa i doŭžyłasia chvilin 40. Kadyraŭ, pavodle Sabčak, dazvoliŭ heta apublikavać, ale pry hetym nie pahadziŭsia na paŭnavartasnaje intervju.
Padčas razmovy Kadyraŭ pytaŭsia, čamu jana piša pra jahonuju śmierć i kranaje temu jaho siamji i syna.
Kadyraŭ: Čamu ty kažaš, što ja pamior?
Sabčak: Ja takoha nie kazała, ja spasyłałasia na krynicy.
Kadyraŭ: Čamu ty čapaješ maju siamju?
Sabčak: Ja nie čapała.
Kadyraŭ: Čamu ty čapaješ majho syna?
Sabčak: Nu vy ž sami vykłali videa i napisali, što hanaryciesia. Navošta vy heta vykłali i napisali?
Kadyraŭ: Ja nie chaču hetaha chavać, niama nijakaha sensu heta chavać.
Sabčak: A vy jaho karali paśla hetaha?
Kadyraŭ: Nie, jon małajčyna, jon pavioŭ siabie jak sapraŭdny mužčyna.
Tak Kadyraŭ aceńvaje pavodziny svajho syna Adama, dzie toj na videa źbiŭ źniavolenaha ŭ SIZA — rasijanina Mikitu Žuraŭla, zatrymanaha za spaleńnie Karana. Videa jašče ŭčora vykłaŭ sam Kadyraŭ, supravadziŭšy heta pachvałoj na adras syna.
Kadyraŭ raspavioŭ Sabčak svaju viersiju zdareńnia, jakaja nie vyhladaje praŭdzivaj.
«My pryjšli ŭ SIZA, bo Žuraviel chacieŭ parazmaŭlać sa mnoj asabista. Skazaŭ, što choča pryniać isłam, ale ja nazvaŭ jaho šajtanam, jaki prosta choča vyratavać svaju škuru. Takija musulmanie mnie nie patrebny.
Ja jamu ničoha nie rabiŭ, bo ja zakonapasłuchmiany hramadzianin. Ale paśla sychodu nie zaŭvažyŭ, što ŭ kabiniecie zastaŭsia Adam. Pačalisia kryki, pasłaŭ achoŭnika ich raźnimać. Adam u mianie tempieramientny i samastojny», — raspavioŭ Kadyraŭ u razmovie z Sabčak.
Heta viersija nie padobnaja da praŭdy, bo Adam, vidavočna, nie zastaŭsia adzin, i jak minimum niechta toje źbićcio zdymaŭ na videa, a jašče niechta pilnavaŭ źniavolenaha. I toje, što sam Kadyraŭ apublikavaŭ złačynstva svajho syna, śviedčyć, što taki pijar byŭ nieabchodny synu Kadyrava.
U razmovie z Sabčak kiraŭnik Čačni adznačyŭ, što kali sud pryznaje jaho syna vinavatym, tady toj «paniasie pakarańnie pa ŭsioj strohaści zakona».
Ale pry hetym Kadyraŭ dadaŭ, što kali Sabčak nie padabajucca pavodziny Adama, to niachaj piša zajavu i pieršaja vychodzić na pikiet, «ale siamju čapać niamožna».
«Vychodź na pikiet, tabie za heta ničoha nie budzie, abiacaju. Možaš i ŭ Čačniu pryjechać u hości, tam usio taksama z taboj budzie narmalna. Pišy pra mianie ŭsio, što zaŭhodna, ale pra siamju niamožna, papiaredžvaju», — zajaviŭ Kadyraŭ.
Sabčak u adkaz na heta ŭ svaim kanale napisała, što pakul nie budzie vyvozić svaju redakcyju z Rasii, «ale zamiežnyja pašparty ŭžo padrychtavali».
Čytajcie taksama:
Kadyraŭ zajaviŭ, što troje jaho niepaŭnaletnich synoŭ udzielničali ŭ bai va Ukrainie
