Алексіевіч абвергла заяву аб роспуску Каардынацыйнай рады, якую СМІ прыпісалі ёй
У СМІ зьявілася інфармацыя аб тым, што Каардынацыйная рада беларускай апазыцыі больш ня дзейнічае, створаная новая рада, імёны сябраў якой трымаюцца ў таямніцы для іх абароны, піша «Свабода».
Пра гэта ў прыватнасьці са спасылкай на нобэлеўскую ляўрэатку Сьвятлану Алексіевіч, якая зьяўляецца сябрай Прэзыдыюму Каардынацыйнай рады, напісала нямецкае выданьне Spiegel, якую пазьней працытавалі расейскія СМІ.
«Каардынацыйнай рады апазыцыі больш няма. Яе сябры альбо былі, альбо знаходзяцца ў турме, былі выгнаныя з краіны або ўцяклі. Створаная новая рада, імёны яе сябраў трымаюцца ў сакрэце для іх бясьпекі. Зносіны вядуцца праз сацыяльныя сеткі», — цытуюць Алексіевіч.
У інтэрвію «Свабодзе» Алексіевіч абвергла гэтую цытату.
«Гэта глупства, гэта зусім ня так, — сказала Алексіевіч. — Шмат новых людзей запісваецца ў Каардынацыйную раду, ёсьць там кіроўны орган. Увесь наш рух працягвае працу. І там зьявіліся новыя людзі, як Баграцоў. І іншыя людзі туды ўваходзяць, але іх імёны не агучваюцца».
