Рэктар Акадэміі кіравання Даніловіч: Чырвоны — старажытны славянскі колер, зялёны — колер багіні Лады, захавальніцы ладу ў дзяржаве
Звязда
У інтэрв'ю «Звяздзе» былы дырэктар Інстытута гісторыі, а сёння рэктар Акадэміі кіравання Вячаслаў Даніловіч зноў паразважаў пра бел-чырвона-белы сцяг, а таксама закрануў пытанне, ці варта прыдумаць альтэрнатыўную сімволіку.
«Каб прыдумаць новы варыянт — патрэбна вялікая грунтоўная даследчыцкая работа, якая ў тым ліку тлумачыла б і значэнне сімвалаў. Але ж ужо існавала добра знаёмая грамадству і нічым не заплямленая сімволіка БССР, прынятая ў 1951 годзе, — мяркуе Даніловіч.
— Дарэчы, яна мае глыбокія сэнсавыя пласты. Тут вам і старажытны славянскі колер сонца і жыцця — чырвоны: яшчэ з часоў старажытнай Русі славяне баранілі свае землі пад чырвонымі сцягамі, сцяг ВКЛ цягам некалькіх стагоддзяў таксама быў чырвонага колеру, як і сцягі ССРБ, ЛітБел і БССР да 1951 года.
Дадайце сюды больш сучасную трактоўку — колер крыві, якую продкі пралілі за свабоду — усё разам выходзіць вельмі сімвалічна.
Калісьці пры БССР вучылі, што зялёны — гэта колер беларускіх лясоў. Але, калі заглыбіцца далей у славянскую сімволіку, — гэта колер багіні Лады — захавальніцы ладу ў сям'і, грамадстве, дзяржаве.
Арнамент на нашым сцягу — увогуле з'ява для дзяржаўнай сімволікі вельмі рэдкая, калі яго прачытаць з пункту гледжання народнага сімвалізму — гэта сімвал засеянага поля, якое дасць ураджай.
Велізарная станоўчая канатацыя закладзена ў гэты сцяг, і ці варта было штосьці кардынальна мяняць?»
«Пад гэтым сцягам БССР у пасляваенныя гады вельмі паспяхова развівалася ў параўнанні з іншымі савецкімі рэспублікамі, было шмат зроблена — была закладзена тая сацыяльна-эканамічная, і грамадска-палітычная, і культурная аснова, якая стала неабходным фундаментам для пабудовы нашай сучаснай незалежнай краіны, якая кіруецца ўласнымі інтарэсамі, а не тым, што ёй навязваюць «дабрахоты» звонку», — мяркуе Даніловіч.
Дырэктар Інстытута гісторыі: Пад бел-чырвона-белым сцягам апрыёры рухаюцца да знешняга пратэктарату
