Знайсці
17.11.2020 / 07:21РусŁacБел

Што адбывалася ў Фрунзенскім РУУС, пад сценамі якога ў нядзелю чулі крыкі?

У нядзелю ўвечары валанцёры пад сценамі Фрунзенскага РУУС паведамлялі, што адтуль даносяцца крыкі. «Наша Ніва» паспрабавала даведацца, што адбывалася ўнутры ў той час.

Фота затрыманняў 15 лістапада, Мінск.

Валанцёры пісалі пра крыкі ў 20:11. Гук нібыта даносіўся з боку актавай або спартовай залы.

Затрыманыя расказалі, што сядзелі ў актавай зале, якая знаходзіцца на другім паверсе. Пры іх нікога не білі.

«Камусьці пры затрыманні зуб выбілі, але пры нас людзей не чапалі», — падзяліўся адзін з хлопцаў. Ён знаходзіўся там з 17 гадзін.

«Калі мы праходзілі спартзалу, там было пуста. Недзе а 18-й завялі яшчэ людзей, некаторых вялі супрацоўнікі ў шлемах, заламаўшы рукі. Хлопцы былі моцна запыханыя і спацелыя, але праз гадзіну астылі і быццам адчувалі сябе нармальна. У РУУС супрацоўнікі вялі сябе карэктна. А каля 21 гадзіны супрацоўніца зайшла ў залу і сказала: «Ваш тэлеграм-канал піша, што вас тут збіваюць і крыкі чутны на вуліцы», — распавёў іншы мужчына.

Крыкаў у актавай зале ніхто не чуў. «Там дзверы, як дамафонныя, якія дрэнна прапускаюць гук».

А 21-22-й некаторых затрыманых мужчын сталі пераводзіць у камеры. Там да іх не прымянялі фізічную сілу, крыкаў людзі не чулі.

«Уначы нас было 11 чалавек у камеры памерам прыкладна тры на два метры», — успамінае мужчына.

Па словах суразмоўцаў, у РУУС часам бывала блытаніна: называлі прозвішчы некаторых затрыманых, а іх саміх знайсці не маглі.

Але два чалавекі згадалі дзіўны эпізод.

«Каля мяне сядзеў мужчына — уразвалку, ногі выцягнуў. Да яго падышоў міліцыянт, рукі ў кішэнях, завязаўся такі дыялог: «Сядзь нармальна». — «А вы прадстаўцеся». — «Я не павінен». — «А чаго ў вас рукі ў кішэнях?» — «Вы не маё кіраўніцтва, каб рабіць заўвагі». Пазней гэты супрацоўнік падыходзіць: трэба пальцы адкатаць. І забраў мужчыну. Пасля мужчына вярнуўся — галава была мокрая ці спацелая — і ўжо ціха сядзеў», — расказаў адзін з затрыманых. 

Ён сцвярджаў, што той чалавек распавёў наступнае. Яго нібыта завялі ў прыбіральню, прыставілі да сцяны, рукі ззаду ўзялі ў кайданкі. Пачалі біць і некалькі разоў акунулі галавой ва ўнітаз.

Па словах суразмоўцы, гэты эпізод адбыўся ці а 19-й, ці а 20-й вечара. Мужчыну было на выгляд гадоў 37-40.

Іншая дзяўчына таксама ўспомніла гэтага чалавека.

«З туалета (ён знаходзіцца пад актавай залай) два міліцыянты вывелі мужчыну з рукамі за спінай. Яго твар, як мне падалося, крывіўся ад болю. Завялі ў спартовую залу, і адтуль ужо былі чутны крыкі і маты. Міліцыя прыніжала яго, ён спрабаваў абараніцца неяк на словах. Калі яго выводзілі з залы, ён сказаў штосьці накшталт: «Вось так вы, хлопцы, з людзьмі абыходзіцеся», — апісала яна той эпізод.

Па часе гэта было паміж 20-й і 21-й гадзінай і доўжылася хвілін 10.

У той дзень Tut.by звяртаўся па каментар у Фрунзенскае РУУС, але супрацоўнікі адмовіліся размаўляць з прэсай.

Наталля Лубнеўская

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера