Лукашэнка — Ціханоўскаму: Твой прэзідэнт у Літве сядзіць
Учора на прэс-канферэнцыі з замежнымі журналістамі Лукашэнка расказаў пра сустрэчу з палітвязнямі ў СІЗА КДБ 10 кастрычніка, перадае БелТА.
Па-першае, Лукашэнка застаўся незадаволены пачутымі ад удзельнікаў сустрэчы прапановамі па неабходных зменах у краіне, яны яму падаліся вельмі сугучнымі з тым, пра якія ў свой час гаварылі расійскія дзеячы Ягор Гайдар і Анатоль Чубайс.
«Вось я сяджу і думаю: дзякуй богу, што вы не прыйшлі да ўлады ў Беларусі. Не таму, што вы несяце бязглуздзіцу. А ўся справа ў тым, што беларускі народ вас бы выправадзіў з улады на працягу аднаго года. Як вы, кажу, далёкія ад гэтага народа», — перакананы Лукашэнка.
Таксама ён пракаментаваў кадры, якія трапілі ў відэа з сустрэчы, дзе некаторыя яе ўдзельнікі смяюцца. Па словах Лукашэнкі, гэта была рэакцыя на такі іх дыялог з Сяргеем Ціханоўскім.
Маўляў, Ціханоўскі запытаўся, калі яго выпусцяць, у адказ пачуў: «А чаго ты да мяне звяртаешся?» — «Дык вы ж прэзідэнт!» — «Не, Сяргей, твой прэзідэнт у Літве сядзіць».
