«Колькі ты яшчэ хадзіць будзеш»: у Гомелі судзілі 73-гадовую пенсіянерку
Суд Цэнтральнага раёна Гомеля 9 лістапада разглядаў справу 73-гадовай Евы Раманаўны Быкоўскай. Па версіі міліцыі, яна ўдзельнічала ў несанкцыянаваным шэсці, піша Радыё Свабода.
25 кастрычніка ў Гомелі анансавалася акцыя пратэсту. У прызначаны час у цэнтры горада сабралася некалькі дзясяткаў чалавек. Яны не трымалі ні сцягоў, ні плакатаў. Тым не менш, міліцыя і АМАП пачалі затрымліваць людзей. Затрымалі і 73-гадовую пенсіянерку Еву Быкоўскую, былую настаўніцу.
Супрацоўнікі АМАП, па сведчанні Евы Раманаўны, вельмі груба абыходзіліся з ёй.
«Лаяліся і матам, і абражалі ўсяляк, крычалі: «С*ка, колькі ты яшчэ будзеш хадзіць?!». Адзін амапавец крычаў: «У яе тата — паліцай!». Гэта надта крыўдна, бо мой тата ваяваў супраць нацыстаў і дайшоў да Берліна. Я была вымушаная потым звярнуцца да псіхолага, у маім жыцці са мной ніхто так не абыходзіўся!» — распавяла пенсіянерка.
У яе забралі мабільны тэлефон — і дагэтуль не вярнулі.
Суддзя Сяргей Кармановіч адправіў справу на дапрацоўку.
