Пасля 30 сутак арышту выйшаў на волю брэсцкі краязнаўца Ігар Бараноўскі
Раніцай 4 лістапада ў Століне выйшаў на волю вядомы брэсцкі краязнаўца, выпускаючы рэдактар газеты «Царква» Ігар Бараноўскі, паведамляе «Брэсцкая газета».
«Вялікі дзякуй журналістцы Людміле Селех за падтрымку ў судзе, за перадачы, за ўвагу да маёй асобы, за матэрыялы, якія чыталі і ў Століне, і ў Берасці. Ужо на свабодзе, хутка сустрэнемся! Жыве Беларусь!» — сказаў Бараноўскі.
«Брэсцкая газета»
Ігара затрымалі ў Брэсце 4 кастрычніка. На наступны дзень відавочцы затрымання паведамілі рэдакцыі «БГ» наступнае: «Яго забралі мэтанакіравана. Затрымалі каля 16-й гадзіны на Савецкай. Забралі кагосьці яшчэ, але яго мэтанакіравана: тыя, хто там быў, сказалі, што міліцэйскі начальнік менавіта на яго паказаў, яшчэ назваў яго непрыгожа: «Вось гэтага…» Ён не супраціўляўся, пайшоў».
Бараноўскаму далі 15 сутак, потым яшчэ 15 сутак па іншым эпізодзе. З 16 кастрычніка ён сядзеў у Століне.
