Знайсці
04.11.2020 / 13:36РусŁacБел

Ператрус у маладзечанскага юрыста і блогера Руслана Кісялёва. Яго забралі ў СК у Мінск

Сёння раніцай адбыўся ператрус у маладзечанскага юрыста, блогера і актывіста Руслана Кісялёва. Пасля ператрусу Кісялёва забралі следчыя ў Мінск, піша Рэгіянальная газета.

Пра тое, што ў Руслана плануюць ператрус, ён паведаміў у 9:30. У двары шматпавярховіка па Вялікім Гасцінцы стаяў цёмна-сіні бус на нумары АМ 0315-3. Яму пазваніў старшы оперупаўнаважаны Дзмітрый Пятроўскі. Паведаміў, што Генеральная пракуратура санкцыянавала ператрус па месцы жыхарства Кісялёва.

«Давайце ўбачымся, інакш мы будзем ламаць дзверы», — сказалі яму па тэлефоне.

Кісялёў задаў пытанне, ці вядзецца нейкая справа ў адносінах да яго. Яму адказалі: «Крымінальная справа, якая расследуецца, засакрэчаная».

Яму таксама прыслалі два смс-паведамленні, меркавана адпраўленыя з нумара Мінскага упраўлення ўнутраных спраў.

Прыкладна ў 10 гадзін пачаўся ператрус, ён доўжыўся каля гадзіны. Пры гэтым прысутнічаў Руслан і яго маці Соф’я. Калі ў кватэру зайшоў сябра Кісялёва, адзін з прысутных сілавікоў сказаў, што ён з Галоўнага ўпраўлення па барацьбе з арганізаванай злачыннасцю і карупцыяй.

Такім чынам, меркавана на аперацыі былі задзейнічаныя дзве групы: адна на бусе з Галоўнага ўпраўлення па барацьбе з арганізаванай злачыннасцю і карупцыяй, другая на серабрыстым Фольксвагене з супрацоўнікамі Следчага камітэта.

Соф’я Кісялёва паведаміла, што з кватэры забралі ноўтбук, тэлефон і электронныя носьбіты інфармацыі. Таксама ёй далі прачытаць пастанову, паводле якой праводзілі ператрус. Соф’я Кісялёва адзначыла, што там фігуравала больш за дзесяць крымінальных артыкулаў, якія дакладна, жанчына не запомніла.

— Як нам патлумачылі, гэта з-за таго, што Руслан выклаў на ютубе запіс размовы з прадстаўніком органаў унутраных спраў, — сказала Кісялёва журналістам «Рэгіянальнай газеты».

Маці сказалі, што Руслана адвязуць у Цэнтральны апарат Следчага камітэта, які месціцца ў Мінску. Кантакт для сувязі пакінулі следчага следчай групы Галоўнага следчага ўпраўлення Следчага камітэта падпалкоўніка юстыцыі Ганчарыка. Таксама сказалі, што, магчыма, Руслана сёння адпусцяць пасля размовы.

Рэгіянальная газета

Хочаш падзяліцца важнай інфармацыяй
ананімна і канфідэнцыйна?

Клас
Панылы сорам
Ха-ха
Ого
Сумна
Абуральна
Каб пакінуць каментар, калі ласка, актывуйце JavaScript у наладах свайго браўзера
Каб скарыстацца календаром, калі ласка, актывуйце JavaScript у наладах свайго браўзера