Патрабуюць адстаўкі Лукашэнкі. У Мінску жанчыны зноў выйшлі на Марш ФОТЫ
«Пашол вон, ты і твой АМОН!» — скандуе калона жанчын на праспекце Незалежнасці ў Мінску. Жанчын патрабуюць адстаўкі Лукашэнкі, свабодных выбараў і аднаўлення законнасці ў краіне.
Вось відэа:
Гэтым разам жанчыны сабраліся ў скверы Сімона Балівара, героя барацьбы за свабоду Лацінскай Амерыкі.
Асобы без апазнавальных знакаў вылоўлівалі жанчын з кветкамі і парасонамі ў нацыянальных колерах на суседніх вуліцах, але ўсіх не адфільтравалі.
Некалькі соцень пайшлі шэсцем.
З акон суседняга Лінгвістычнага ўніверсітэта студэнты віталі дэманстрантак нацыянальнымі сцягамі і радаснымі воклічамі.
Пасля гэтага калона скіравалася на праспект.
На марш выходзяць не ўсе. Тыя, хто баіцца затрыманняў, проста гуляюць з кветкамі па праспекце Незалежнасці паасобку. Тыдзень і два тыдні таму такіх было некалькі тысяч чалавек. Яны шпацыравалі на амаль трохкіламетровым адрэзку ад плошчы Незалежнасці да плошчы Якуба Коласа.
Жаночыя пратэсту ў Мінску па суботах працягваюцца ўжо амаль тры месяцы. У панядзелкі на цэнтральны праспект сталіцы выходзяць пенсіянеры — апошнія тыдні іх было некалькі тысяч. А ў чацвяргі сваё шэсце сталі праводзіць асобы з інваліднасцю.
Чаму менавіта гэтыя групы насельніцтва маніфестуюць асобна? Бо лукашэнкаўцы масава затрымліваюць сваіх праціўнікаў. За час прэзідэнцкай кампаніі і пасля яе адбылося ўжо больш за 14700 затрыманняў. Выступы старых людзей і інвалідаў, якіх затрымліваюць мінімальна, гэта яшчэ і пратэсты супраць палітычнага гвалту.
