Даслаць навіну
Знайсці
17.10.2020 / 23:47 1

Рэпарцёраў Заміроўскага, Спевак і Зарубіна за іх працу закінулі на Акрэсціна. Расказваем, чым яны вядомыя

У суботу сілавікі забралі траіх з нашых шэрагаў. Спачатку — «для праверкі дакументаў», якая ў Беларусі можа цягнуцца невядома колькі. Але хутка высветлілася, што ўсё яшчэ горай: супраць іх пачалі «адміністрацыйны працэс», мінімум да панядзелка яны будуць сядзець у чаканні суда на Акрэсціна. Хто яны — людзі, якія робяць карцінку і здабываюць інфармацыю ў немагчымых умовах?

Вадзім Заміроўскі, фатограф Tut.by і БелаПАН

Павялічыць

Вадзім Заміроўскі. Фота Сяргея Балая

Вадзім Заміроўскі — адзін з найвядомейшых і найпаспяховейшых фатографаў Беларусі, хоць сам мае армянскія карані. У Мінск Вадзім прыехаў у 1991 годзе, з таго часу тут і жыве. З жонкай Марынай гадуе сына Яна, якому няма яшчэ і годзіка. 

Пакуль тата на Акрэсціна, Марына вымушана спраўляцца сама: «Вадзік, мы чакаем цябе. Дзякуй за праўду! Ты не баішся, ты ідзеш і робіш сваю работу. Ты наш герой!»

Павялічыць

Вадзім з Марынай і Янам. Фота з сямейнага архіву.

Вадзім вядомы ў Беларусі найперш як фатограф найпапулярнейшага беларускага партала Tut.by, для якога ён здымае апошнія сем гадоў. Заміроўскага з камерай можна ўбачыць паўсюль, дзе адбываецца штосьці важнае. Але хіба найбольш яго хвалююць чалавечыя праблемы ў кропках канфліктаў. Людскі боль не дае яму спакою. Ён і на Данбас у 2017-м паехаў, каб зафіксаваць, як працуюць медыкі на фронце, «Наша Ніва» друкавала гэты спецрэпартаж.

Вадзім — адзін з нямногіх фатографаў, якога мінчукі пазнаюць на вуліцах, да якога падыходзяць і дзякуюць за працу. Але сам Вадзім надзвычай сціплы чалавек, ён не імкнецца да нейкіх самасцвярджэнняў, апроч як кудысьці паехаць і зрабіць фотарэпартаж.

Здымкі Вадзіма разлятаюцца па ўсім свеце. Адзін з апошніх кадраў, які абляцеў планету, — з мінскага пратэсту. Дзяўчына сядзіць на зямлі перад сілавікамі, у вачах — адчай. Фота ўвайшло ў топ-20 найлепшых здымкаў тыдня The Guardian. І такіх кадраў у Вадзіма шмат.

Павялічыць

Фота Вадзіма Заміроўскага, TUT.BY

Каб не Вадзім, можа, не было б і найпрэстыжнейшага конкурсу для беларускіх фатографаў «Прэс-фота Беларусі». Вадзім шмат гадоў быў шчыра адданы гэтаму праекту.

Усевалад Зарубін, відэааператар Tut.by і БелаПАН

Відэааператар Усевалад Зарубін нарадзіўся ў Германіі, а пасля з бацькамі вярнуўся ў Беларусь і правёў дзяцінства ў Брэсце. Вучыўся ў Акадэміі мастацтваў. Хлопец любіць усё, што звязана з тэхнікай, і асвойвае ўсе навінкі, якія толькі з’яўляюцца. Ён, дарэчы, адным з першых набыў 3D-прынтар.

Павялічыць

Фота з Facebook

У камандзе Tut.by Усевалад з 2017 года. У відэаадзеле яго называюць тэхнічным гуру. Хлопец любіць актыўны рытм жыцця і кайфуе ад сваёй працы. Ездзіў у камандзіроўкі не толькі па Беларусі, але і ў Грузію, Украіну.

Дома яго зараз чакаюць жонка Ганна і дачка-школьніца Варвара.

Дар’я Спевак, рэпарцёрка Onliner.by

Дар’я Спевак — журналістка «Анлайнера». Сама яна са Светлагорска. Тры гады таму скончыла Інстытут журналістыкі БДУ, працавала ў «Звяздзе».

Вучылася таксама на розных курсах для журналістаў, ездзіла на стажыроўку ў Вялікабрытанію. Для «Анлайнера» яна рыхтавала серыю душэўных сюжэтаў пра доўгажыхароў у глухіх вёсках, рэпартаж з чарнобыльскай зоны. 

Павялічыць

Фота з Instagram

У вольны час Дар’я падарожнічае па закутках Беларусі і чытае Караткевіча з Барадуліным. Горача любіць свайго ката. Гэта смелая дзяўчына з вострым пачуццём гумару. 

У мінулыя выходныя журналістку затрымалі падчас працы ў Гродне, але праз некалькі гадзін адпусцілі. На гэты раз сілавікі заломлівалі ёй рукі, калі вялі да машыны.

Настасся Роўда, Наталля Лубнеўская

Хочаш падзяліцца важнай інфармацыяй
ананімна і канфідэнцыйна?

2
Той самы / адказаць
18.10.2020 / 10:39
Шчыра жадаю выйсьці на волю журналістам і працягваць сваю патрэбную працу.

Разам з тым, калі чытаеш падобныя "перліны" не разумееш ці тое няўдалы жарт, ці то не ведаў што сказаць, той хто напісаў падобнае.
"Вадзім Заміроўскі — адзін з найвядомейшых і найпаспяховейшых фатографаў Беларусі, хоць сам мае армянскія карані.

А зараз пытаньне - прычым тут армянскіе карані? Вынікае, хоць хлапец мае армянскія карані, але тым не меньш ёсьць вельмі пасьпяховым фатографам... )))
Каб пакінуць каментар, калі ласка, актывуйце JavaScript у наладах свайго браўзера
пїЅпїЅпїЅ пїЅпїЅпїЅпїЅпїЅ, пїЅпїЅпїЅпїЅпїЅпїЅпїЅпїЅпїЅ JavaScript пїЅ пїЅпїЅпїЅпїЅпїЅпїЅпїЅ пїЅпїЅпїЅпїЅпїЅпїЅ пїЅпїЅпїЅпїЅпїЅпїЅпїЅ, пїЅпїЅпїЅ пїЅпїЅпїЅпїЅпїЅ пїЅпїЅпїЅпїЅпїЅ пїЅ пїЅпїЅпїЅпїЅпїЅпїЅпїЅ
пїЅпїЅпїЅпїЅпїЅпїЅпїЅпїЅпїЅпїЅпїЅ...
Каб скарыстацца календаром, калі ласка, актывуйце JavaScript у наладах свайго браўзера
2019 2020 2021
верасень кастрычнік лістапад
ПН АЎ СР ЧЦ ПТ СБ НД
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31