Даслаць навіну
Знайсці
17.10.2020 / 10:32 3

«Мы супраць хлусні і гвалту, супраць беззаконня і ўціску правоў» — моцны відэазварот работнікаў «Гродна Азот»

«Мы, работнікі ААТ «Гродна Азот», звяртаемся да ўсіх жыхароў нашай краіны. Мы, азотаўцы, як і многія іншыя, не можам заставацца ўбаку ад таго, што адбываецца ў нашай любімай Беларусі.

Мы стаміліся і катэгарычна супраць падману і жорсткасці. Супраць той бесчалавечнасці, якая адбываецца цяпер на вуліцах на нашых вачах і вачах нашых дзяцей.

Мы хочам звярнуцца да работнікаў іншых дзяржаўных прадпрыемстваў Беларусі. Што б ні казалі пра нас у афіцыйных дзяржаўных СМІ, мы салідарныя з вамі. І не можам проста назіраць за тым, што адбываецца, збоку. Абсалютная большасць работнікаў нашага завода прытрымліваецца гэтай жа пазіцыі. Але не ўсе могуць адкрыта яе выказваць з розных прычынаў.

Калі гаварыць пра прычыны, хочам звярнуцца да адміністрацыі прадпрыемства. Многія з вас таксама супраць таго, што адбываецца ў краіне, але не могуць казаць пра гэта адкрыта. Калі ласка, перастаньце перашкаджаць выказванню сваёй думкі работнікамі прадпрыемства. Бо кожны грамадзянін нашай краіны мае права на свой пункт гледжання, які можа не супадаць з вашым. Перастаньце ціснуць на людзей і запалохваць іх. Мы і так моцна занепакоеныя колькасцю нашых супрацоўнікаў, што звальняюцца. Сярод іх спецыялісты, на падрыхтоўку якіх патрэбныя гады. Развальваюцца цэлыя калектывы.

Мы звяртаемся да адміністрацыі горада і вобласці. Хочам нагадаць вам, што ўсе падзеі ў горадзе і краіне бяруць свой пачатак з абвяшчэння вынікаў выбараў на выбарчых участках. І абсалютна неабгрунтаванага прымянення гвалту сілавікамі на вуліцах нашых гарадоў. Вы нам абяцалі не перашкаджаць мірным акцыям, мітынгам і шэсцям. Вы нам абяцалі, што больш на вуліцах нашага горада не будзе сілавікоў без форменнага адзення і без знакаў адрознення. Аднак рэпрэсіі працягваюцца і далей, нават супраць журналістаў, старых і дзяцей. Мы не можам спакойна назіраць, як святлашумавымі гранатамі закідваюць нашых маці. І калі не ваша кампетэнцыя змяненне палітычнай сітуацыі ў краіне, то спыніць гвалт у дачыненні да мірных грамадзянаў у вашых сілах.

Мы занепакоеныя ўцечкай за мяжу спецыялістаў і працоўных кадраў. Таксама высокакваліфікаваныя кампаніі айці-сферы вымушаныя пераносіць свае офісы і бізнэсы ў цэлым у суседнія краіны. Што не можа не адбіцца на эканамічнай сітуацыі ў краіне.

Гняце сітуацыя з беспрэцэдэнтным ціскам на студэнтаў. Гэта будучыня нашай краіны, і мы не маем права яе страціць і ўпусціць.

Цяжка глядзець на ціск, які чыніцца на работнікаў культуры, калі закрываюцца цэлыя тэатры.

На медыкаў — і ў такі складаны для іх час, калі яны, не апускаючы рук, змагаюцца з пандэміяй.

На найлепшых трэнераў і спартоўцаў, на гонар нашай краіны ў і так вельмі складаны час для беларускага спорту.

Лічым непрымальным рэгулярны крымінальны пераслед кандыдатаў у прэзідэнты, іх паплечнікаў, сябраў штабоў і ініцыятыўных групаў. Толькі з кандыдатаў у 2006 асуджаны Казулін, у 2011-м — Някляеў, Вус, Рымашэўскі, Саннікаў, Статкевіч, у 2020-м у СІЗА Ціханоўскі і Бабарыка.

Мы, як і астатнія жыхары Беларусі, за праўду, права і магчымасць мець сваю думку.

Мы супраць хлусні і гвалту, супраць беззаконня і ўціску правоў. У тым ліку і права выбару. Супраць фальсіфікацыі і жорсткасці.

Мы патрабуем абароны і выконвання нашых канстытуцыйных правоў.

Артыкул 21. Забеспячэнне правоў і свабодаў грамадзян Рэспублікі Беларусь ёсць найвышэйшая мэта дзяржавы.

Артыкул 33. Кожнаму гарантуецца свабода меркаванняў, перакананняў і свабоднае іх выказванне. Манапалізацыя сродкаў масавай інфармацыі дзяржавай, грамадскімі аб'яднаннямі або асобнымі грамадзянамі, а таксама цэнзура не дапускаюцца.

Артыкул 35. Свабода сходаў, мітынгаў, вулічных шэсцяў, дэманстрацый і пікетаванняў, якія не парушаюць правапарадак і права іншых грамадзянаў Рэспублікі Беларусь, гарантуюцца дзяржавай.

Артыкул 38. Грамадзяне Рэспублікі Беларусь маюць права свабодна выбірацца і быць выбранымі.

Таксама мы засмучаныя сітуацыяй на міжнароднай арэне. Адкліканнем паслоў практычна ўсіх еўрапейскіх дэмакратычных краінаў. Мы баімся эканамічных санкцый для нашай краіны і закрыцця межаў, што можа выклікаць цяжкасці ў рэалізацыі нашай прадукцыі за мяжой.

Мы абураныя, што так і не заведзеная ніводная крымінальная справа па фактах збіцця мірных грамадзянаў і затрыманых. Па фактах гібелі людзей на вуліцах і пасля Акрэсціна. Хоць увесь інтэрнэт поўны жудаснымі дыягназамі, відэа збіванняў і фота іх наступстваў.

Мы хочам выказаць шчырае спачуванне ўсім семʼям загінулых і зніклых без вестак, усім пацярпелым пры затрыманнях. Выказаць сваю падтрымку тым, каго пераследуюць з палітычных матываў і іхнім семʼям.

Мы хочам жыць у свабоднай і незалежнай Беларусі. Мы — сэрца беларускай хіміі. І сёння гэтае сэрца, нягледзячы ні на што, бʼецца ва ўнісон з сэрцамі мільёнаў беларусаў, якія ступілі на дарогу пераменаў».

Зварот сканчаецца песняй гурта «Тор Бэнд» — «Уходи».

NN.by

Хочаш падзяліцца важнай інфармацыяй
ананімна і канфідэнцыйна?

1
Alisa / адказаць
17.10.2020 / 10:51
Ну зараз Каранік з Караевым да вас прыедуць і пакажуць як Беларусь любіць - во ўжо волю ўзялі ў вольным горадзе Гародні - выступаць супраць гвалту
1
Alice1972 / адказаць
17.10.2020 / 17:21
Alisa, так правільна ж зрабілі, ужо ўсім відавочна, што рэканструкцыі былога жыцця не можа адбыцца. Колькі б не выступалі лукашэнкі - караевы - караннікі, краіна іх намаганнямі ператварылася ў іньшую, толькі яны гэтага не бачаць пакуль. Людзі з'ехалі, бізнес закрылі / разрушылі, з палітычнымі суседзямі  перасварыліся. Няўжо, калі хто моцна і подла паб'е свайго сябра, будзе чакаць ад яго добрых зносін ? 
0
Кругом работающие пенсионеры / адказаць
19.10.2020 / 12:55
И всё?! Ладно. Время покажет. Куда пойти работать?! Заводы, ЖКХ, Сторожа, СТО везде пенсионеры. Пенсия маленькая?! Это сколько?! 400-700 рублей.
Каб пакінуць каментар, калі ласка, актывуйце JavaScript у наладах свайго браўзера
пїЅпїЅпїЅ пїЅпїЅпїЅпїЅпїЅ, пїЅпїЅпїЅпїЅпїЅпїЅпїЅпїЅпїЅ JavaScript пїЅ пїЅпїЅпїЅпїЅпїЅпїЅпїЅ пїЅпїЅпїЅпїЅпїЅпїЅ пїЅпїЅпїЅпїЅпїЅпїЅпїЅ, пїЅпїЅпїЅ пїЅпїЅпїЅпїЅпїЅ пїЅпїЅпїЅпїЅпїЅ пїЅ пїЅпїЅпїЅпїЅпїЅпїЅпїЅ
пїЅпїЅпїЅпїЅпїЅпїЅпїЅпїЅпїЅпїЅпїЅ...
Каб скарыстацца календаром, калі ласка, актывуйце JavaScript у наладах свайго браўзера
2019 2020 2021
верасень кастрычнік лістапад
ПН АЎ СР ЧЦ ПТ СБ НД
1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31