«Мяняюцца палітычныя настроі ў турмах»
Дэманстранты каля ізалятара на Акрэсціна. Фота Надзеі Бужан
Беспрэцэдэнтная колькасць палітвязняў у турмах уплывае на настроі крымінальных вязняў і персаналу. Пра гэта сведчаць абрыўкі інфармацыі, якія даходзяць з турмаў праз ліставанне і ад тых людзей, якія выходзяць.
За жнівень-верасень праз турмы прайшлі тысячы затрыманых. Акрамя таго, у СІЗА ўтрымліваюцца некалькі соцень арыштаваных па крымінальных справах. Іх, да таго ж, пераводзілі з турмы ў турму.
З «палітычнымі» перасякаюцца тысячы вязняў і супрацоўнікаў МУС. Гэта стварае нечаканыя сацыяльныя кантакты ў асяроддзях, у якія ў іншай сітуацыі апазіцыйныя ідэі не маглі б пранікнуць хутка.
Атрыманне турэмнага досведу тысячамі праціўнікаў дыктатуры і іх уплыў на настроі «за мурамі» — нечаканае наступства масавых рэпрэсій 2020-га, якое можа мець доўгатэрміновы эфект.
