«Як адны аддаюць загады, а другія — падпарадкоўваюцца»: на наступным тыдні выйдзе «Рэвалюцыя» Віктара Марціновіча
Беларускі пісьменнік і публіцыст Віктар Марціновіч напісаў, што на наступным тыдні выйдзе з друку яго раман «Рэвалюцыя». Пра гэта ён паведаміў у сваім фэйсбуку.
«Я насіў гэты раман у сабе 12 гадоў. Ягоныя героі засялялі мяне, бы прывіды закінуты дом.
Найбольш трывожныя сцэны прарываліся ў мае сны.
У мінулым годзе я ў чарговы раз узяўся за рэдактуру і зразумеў, што тэкст — гатовы. Пачалася руплівая праца па перакладзе і падрыхтоўцы да выданняў. У снежні 2019 я анансаваў яго для «Ilinterviews».
Цяпер «Рэвалюцыя» існуе на трох мовах.
Першым выйдзе беларускі варыянт. Шукайце яго ў крамах напрыканцы наступнага тыдня.
«Рэвалюцыя» — гэта раман пра ўладу. Але не пра палітычную ўладу, а пра тую глыбінную, асабістую і страшную стыхію, якая вымушая адных — аддаваць загады, другіх — падпарадкоўвацца. Пра тую ўладу, прага да каторай так цікавіла Ніцшэ.
Калі яшчэ карацей, гэты раман — пра тое, як адзін добры чалавек, паддаўшыся спакусам, пакрысе ператвараецца ў кусок гаўна.
Раман выходзіць у выдавецтве «Кнігазбор», перакладчык на беларускую — Віталь Рыжкоў.
Выдавец у Расіі — «Время» (2020/2021).
Выдавец у Нямеччыне — Voland und Quist (лістапад/снежань 2020). Перакладчык на нямецкую — Томас Вайлер.
Віктар Марціновіч напісаў сем раманаў, раней выйшлі «Параноя», «Сцюдзёны вырай», «Сфагнум», «Мова», «Возера радасці», «Ноч».
