«Адчуванне, што яны баяцца больш, чым мы». Філосаф Вольга Шпарага пра сваё затрыманне
Вольгу разам з мужам, філёзафам Аляксандрам Адамянцам, затрымалі 4 кастрычніка ў Менску на вуліцы Кальварыйскай, піша Радыё Свабода.
Пра тое, што сябру асноўнага складу Каардынацыйнай Рады філёзафа Вольгу Шпарагу затрымалі разам з мужам Аляксандрам Адамянцам, стала вядома ўдзень 4 кастрычніка. На волі Вольга была ўжо менш як праз суткі. Яна расказала Свабодзе, што затрыманьне не зьвязанае зь яе дзейнасьцю ў КР.
«Затрымалі нас разам з усімі іншымі мінчанамі, як гэта звычайна адбываецца па нядзелях, — кажа Вольга. — На Кальварыйскай пад’ехалі бусікі, пачалі выхопліваць людзей з натоўпу. Яны галоўным чынам палявалі на мужчын, а я не захацела аддаваць мужа. І вось мой муж папаўся, і я неяк вырашыла, што таксама пайду. Не аддам яго проста так».
Пасьля гэтага Вольгу і Аляксандра адвезьлі ў РУУС Маскоўскага раёну, а адтуль — у турму Жодзіна. Па яе словах, разам зь ёй і мужам на вуліцы Кальварыйскай затрымалі яшчэ 23 чалавекі. Іх усіх таксама адвезьлі ў Жодзіна і ўжо на наступны дзень асудзілі. Самой Вользе з мужам ня так «пашанцавала».
«Было незразумела ўвогуле, што нам пагражае, — прызнаецца Вольга. — Я сказала, што мы маем адваката, і нас выпусьцілі з позвай да суду. Ён адбудзецца ў Смалявічах, неабходна будзе зьявіцца на паседжаньне. Дата пакуль ня вызначаная. Мне патэлефануюць і паведамяць, калі будзе суд».
Вольга расказвае, што сілавікі паводзілі сябе жорстка. Па дарозе ў Жодзіна ў аўтазаку на падлогу паклалі бел-чырвона-белы сьцяг, на мужчын крычалі, наносілі ім удары.
«Яны робяць выгляд, што яны страшныя, — кажа Вольга. — Але нават у турме яны ў балаклавах, і ад гэтага, канечне, адчуваньне, што яны баяцца больш, чым мы. Вядома, там ёсьць усё гэтае накшталт «рукі трымаць за сьпінай», «рухацца ў пэўным рытме». Яны ствараюць для нас уражаньне, што мы страшныя злачынцы і з намі трэба жорстка абыходзіцца. Ня біць, але абыходзіцца як са злачынцамі. Але пры гэтым ты бачыш, што яны не здымаюць балаклавы.
У мяне ад гэтага страх зьнікае. Вядома, у турме лепш не рабіць нечага, што выкліча гвалт. Бо яны гатовыя да гэтага, гатовыя лішні раз ударыць і голас павысіць. Але пры гэтым у мяне склалася ўражаньне, што тэрыторыя іх улады вельмі абмежаваная».
Паводле інфармацыі МУС, 4 кастрычніка на несанкцыянаваных акцыях пратэсту ў Беларусі затрымалі 317 чалавек, 258 зь іх пакінулі пад вартай.
