Сталічныя таксісты патрабуюць павысіць тарыфы: у выпадку адмовы яны абяцаюць блакаваць вуліцы
У рэдакцыю auto.tut.by звярнуліся сталічныя таксісты, незадаволеныя сваімі заробкамі. Яны патрабуюць ад службаў і сэрвісаў, у якіх яны працуюць, павышэння кошту кіламетра прабегу на 5 капеек. У выпадку адмовы кіроўцы абяцаюць усімі законнымі спосабамі блакаваць працу службаў таксі.
— Менавіта з-за існуючых тарыфаў кіроўцам даводзіцца працаваць па 16, а то і 18 гадзін. Каб хоць нешта ды зарабіць. І гэта ўжо становіцца небяспечна, — тлумачыць пазіцыю незадаволеных адзін з ініцыятараў патрабаванні.
Першыя спробы выказаць незадаволенасць сітуацыяй, з тарыфамі таксісты рабілі ўжо ў сярэдзіне лістапада мінулага года.
Публікуем поўны тэкст ліста, які трапіў у рэдакцыю. Пад лістом за сённяшні дзень падпісалася ўжо 105 чалавек.
Гэты ліст актыўныя кіроўцы ўжо даслалі на дыспетчарскія службы і да 30 студзеня будуць чакаць адказу. Калі цэннікі не паднімуць, таксісты абяцаюць блакаваць працу перавозчыкаў і сэрвісаў кожны працоўны дзень з 7 раніцы да 12.00. Прасцей кажучы, вадзіцелі проста не будуць прымаць заказы ад пасажыраў, а для тых, хто выйдзе на працу, проста будуць ствараць фэйкавыя заказы.
Акрамя таго, наш суразмоўца таксама паведаміў, што таксісты вядуць размовы аб крайняй меры: перакрыць у гадзіну пік цэнтральны праспект у адной з кропак.
