Марыя Ханяўка
У Нью-Брансўіку (ЗША) на 95-м годзе пайшла з жыцьця Марыя Ханяўка — удзельніца-арганізатарка грамадзкіх застольных бяседаў ды іншых імпрэзаў, ладжаных у Новым Сьвеце беларускай дыяспарай. Сьветлай памяці Марыя і яе муж інжынэр Часлаў выгадавалі дачку Рагнеду ў беларускім духу. Бацька прынцыпова не гаварыў да дачкі-школьніцы па-амэрыканску, казаўшы: «Вучыся па-беларуску!»
Марыя Ханяўка была жанчынай прыгожай, разумнай, энэргічнай, добрай — добрай маткай і жонкай. Доўгімі гадамі яна даглядала дома свайго цяжкахворага мужа. Часлаў Ханяўка прыходзіўся стрыечным братам былому старшыню Рады БНР Вінцэнту Жук-Грышкевічу. Абодва яны былі з Будслава.
Цела Марыі Ханяўкі спачывае побач зь яе мужам на беларускім могільніку Жыровіцкае Божае Маці ў Іст-Брансўіку, ЗША. Вечная Ёй памяць, а душы Яе вечны супакой.
Ад імя беларускага грамадзтва Канады выказваю глыбокія спачуваньні сям’і памерлае Марыі — Рагнедзе й Доналду Ўітні, унуку Данілку, праўнукам ды Эдварду Шулячкоўскаму.
Раіса Жук-Грышкевіч
