У Беларусі здымаюць кіно пра забойства Кубэ + фота

На станцыі Дубіца Брэсцкай вобласці знялі першыя сцэны новага фільма «Паляванне на гаўляйтара». Яго сюжэт заснаваны на мінскіх падзеях 1943-га. Пачаліся здымкі сімвалічна 22 верасня — напярэдадні гадавіны забойства гаўляйтара Беларусі Вільгельма Кубэ.

Робіць васьмісерыйную стужку расійская кінастудыя Star Media разам з «Беларусьфільмам».

Беларуская кінастудыя прывабіла стваральнікаў багаццем рэквізіту

: як паведамляе «Вечерний Брест», «мясцовы цэх падрыхтоўкі здымак прапануе звыш 80 тысяч адзінак мужчынскай і жаночай ваеннай вопраткі, галаўных убораў і абутку, звыш 25 тысяч адзінак рэквізіту і валодае салідным аўтапаркам дадзенага перыяду».

Здымае «Паляванне на гаўляйтара» расійскі рэжысёр Алег Базілаў.

У спісе яго дасягненняў ёсць некалькі ідэалагічна вывераных фільмаў пра сучасныя расейскія войны: ён быў рэжысёрам «Дэсантуры» і прадусарам «Гразавых варотаў».

Будынак станцыі Дубіца быў ператвораны ў стары мінскі вакзал. Здымалі там дзве сцэны: бамбёжку і эвакуацыю першых дзён вайны, а таксама прыбыццё ў Мінск Кубэ з сям’ёй.

Наступныя сцэны будуць здымаць у Бабруйску — руіны казармаў увасобяць разбураны бомбамі Мінск. (Як варыянт разглядалі парэшткі кляштара ў Бярозе, але абралі-такі Бабруйск).

У масавых сцэнах задзейнічаныя каля 250 запрошаных у масоўку людзей.

Наступнымі пабачыць сябе ў кіно атрымаюць магчымасць жыхары Бабруйска — іх на кастынг запрашаюць 5 кастрычніка (ад 17.00 да 18.00 да кінатэатра «Мір»).

Падкрэсліваецца, што

стваральнікі карціны не прэтэндуюць на гістарычную праўду

: сцэнар Ігара Цер-Карапетава — «лёгкі намёк» на рэальныя падзеі. Нават імёны герояў змененыя —

Кубэ зрабіўся Краўбэ, Марыя Восіпава стала Марыяй Архіпавай, а Алена Мазанік — Галінай Памазанік.

Паводле рэжысёра, у сюжэце пераплеценыя «і гістарычны раман, і ваенна-псіхалагічная драма, і любоўныя лініі. І ўсё гэта на фоне барацьбы партызан і падпольшчыкаў з фашысцкімі акупантамі».

У фільме здымаюцца Анастасія Заваратнюк, Марыя Машкова, Аляксандр Дзячэнка, Аляксандр Кашпераў.

Найхутчэй, атрымаем усярэдненае «кіно пра вайну», якога багата здымаюць расійскія кінастудыі. Наўрад ці ў ім будзе намёк хоць на якую беларускасць — апроч геаграфічнай.

На экранах «Паляванне на гаўляйтара» з’явіцца ў маі 2012 года.

* * *

Забойству Генеральнага камісара Беларусі Вільгельма Кубэ быў прысвечаны адзін з самых вядомых фільмаў савецкага кінематографа «Гадзіннік спыніўся апоўначы» (1958 год). Пра забойства Кубэ распавядаў і шэраг дакументальных фільмаў.

СМ

Хочаш падзяліцца важнай інфармацыяй
ананімна і канфідэнцыйна? Пішыце рэдактару
«Нашай Нівы» ў ТГ