«Па тэлефоне можна ж і знішчыць любога чалавека». Лукашэнка расказаў, чаму мабільная сувязь не для яго
На сустрэчы з калектывам завода «БелДжы» 19 студзеня Лукашэнка пацвердзіў, што амаль не карыстаецца сучаснымі тэхналогіямі, у тым ліку і мабільнай сувяззю. Прычына ў тым ліку і ў страху быць адсочаным.
«У нас некаторыя крыўдзяцца: няма свабоды слова, чагосьці таго няма!
Мабільны тэлефон — гэта кантроль за вамі штосекундна, калі вы яго носіце ў кішэні. Па гэтым тэлефоне можна ж і знішчыць любога чалавека. Я ведаю шкоду гэтых тэлефонаў, таму я па мабільным тэлефоне размаўляю ў месяц мо адну хвіліну.
Хоць нашыя хлопцы вынайшлі адмысловую сувязь. Закрытая сувязь, там усяго некалькі дзясяткаў тэлефонаў», — сказаў Лукашэнка.
Што да інтэрнэту, то ён зноў выказаўся пра яго негатыўна, як пра тое, дзе моладзь шукае «ўсялякае паскудства, як зрабіць выбуховую прыладу, парнаграфію там і іншае». Праўда, і Коля Лукашэнка таксама шмат сядзіць у інтэрнэце, але ён робіць гэта з карысцю, бо, маўляў, знаходзіць і пасля паказвае бацьку тое, што пра яго там пішуць.
Урэшце ж Лукашэнка праанансаваў новыя меры, якія плануюцца па далейшым блакаванні ў Беларусі інтэрнэту:
«Я не вельмі вялікі спецыяліст у інтэрнэце, але мяне неяк нядаўна праінфармавалі, што дадатковыя меры прымаюцца па блакаванні такіх сайтаў і такой інфармацыі, якая нашым дзецям увогуле не павінна быць даступная. Гэта дадаткова прымем рашэнне».
Чытайце таксама:
Качанаву запыталіся пра Пуціна, а яна па звычцы расхваліла Лукашэнку
На заводзе «БЕЛДЖЫ» Лукашэнку паказалі начынку Geely. Колькі беларускага ў аўто?
Качанава выгуляла на МТЗ раскошную шубу са скандынаўскай норкі
