У Браславе затрымалі супрацоўнікаў Музея традыцыйнай культуры
Тэлеканалу «Белсат» стала вядома пра затрыманне супрацоўнікаў Музея традыцыйнай культуры ў Браславе. У дамах быў праведзены ператрус, затрыманая дырэктарка ўстановы.
Выстава «Калядныя ўзоры», якая праводзілася ў музеі ў 2022 годзе. Фота: braslav-star.by
Затрыманне адбылося ўначы напярэдадні выставы «Калядныя ўзоры», якая адкрылася ў музеі 22 снежня.
Паводле інфармацыі «Белсата», уначы ў чацвер у дамы да супрацоўнікаў Музея традыцыйнай культуры прыйшоў АМАП. Сярод затрыманых — загадчыца музея Элеанора Зінкевіч, яе муж, а таксама іншыя супрацоўнікі ўстановы.
У дамах усіх супрацоўнікаў быў праведзены «старанны ператрус», падчас якога знайшлі кнігі па гісторыі Беларусі, а таксама канфіскавалі стары дакумент з пячаткай, на якой выяўленая «Пагоня».
Некаторых супрацоўнікаў ужо адпусцілі, некаторыя, уключна з дырэктаркай, дасюль знаходзяцца ў міліцыі.
Прычыны затрымання не паведамляюцца.
У праграме выставы «Калядныя ўзоры» значыліся батлейка «Цар Ірад», майстар-класы, выстава вінтажных навагодніх цацак. Паведамляецца, што на выставу прыйшло шмат людзей, таму яе было вырашана не адмяняць, нягледзячы на тое, што супрацоўнікаў музея не было на месцы.
Чытайце таксама:
Паведамляецца пра затрыманні на фестывалі кіно ў мінскім кінаклубе
У Гомелі асудзілі жанчыну, якая выклала ў тыктоку відэа інцыдэнту з супрацоўнікам ДАІ і сваёй дачкой
