Жыхара Вілейкі тры дні шукала міліцыя і «анёлы», а ён вярнуўся дахаты з сяброўкай і нават пераначаваў з ёй
35-гадовы Максім Тышкоўскі з сябрам 29 лістапада выехаў на заробкі з Вілейкі ў Віцебск. Сябры затрымаліся на вакзале ў Полацку, дзе Тышкоўскі і знік. Яго таварыш вярнуўся ў Вілейку.
Вілейчука шукалі мясцовая міліцыя і пошукава-выратавальны атрад «Анёл», піша kraj.by.
У абед 2 снежня маладзечанскі каардынатар «Анёла» Максім Федаровіч паведаміў, што зніклага знайшлі.
Kraj.by
Журналісты датэлефанаваліся маці Максіма Тышкоўскага. Яна распавяла:
— Сын жыве са мной. Ой, ды яшчэ ўчора ўвечары, напэўна, пасля 22:00, прыйшоў дадому з нейкай жанчынай. Яны пераначавалі, а раніцай сышлі. Назад сын вярнуўся адзін. Я думаю, што хадзіў яе праводзіць. Можа, яна з Віцебска ці Полацка. Не ведаю. А сын цяпер сядзіць вунь на кухні. Ды куды ён дзенецца? Я ж думала, паедзе на заробкі, грошай, можа, прывязе. Дык не. Такі вось у мяне 100-працэнтны хлопец…
