Гадзіннік жыхара Віцебска з «Тытаніка» прадалі на аўкцыёне
Яго цана вырасла больш як у два разы.
Гадзіннік Сіная Кантара. Фота: Heritage Auctions
Гадзіннік эмігранта з Беларусі Сіная Кантара прададзены 11 лістапада на таргах брытанскага аўкцыёну Henry Aldridge & Son Ltd, прысвечаных «Тытаніку», за 75 тысяч фунтаў стэрлінгаў, піша «Беларусь і свет».
Лот пад нумарам 288 ішоў самым апошнім на аўкцыёне, які доўжыўся каля 4,5 гадзіны, ён быў набыты інтэрнэт-карыстальнікам, імя якога невядома.
Гадзіннік-цыбуліну загінулага пры пераездзе ў ЗША пасажыра выстаўлялі са стартавым коштам у 30 тысяч фунтаў стэрлінгаў. У выніку цана лота літаральна за паўхвіліны вырас з 30 тысяч да 75 тысяч.
У 2018 годзе на амерыканскім аўкцыёне гэты хранометр быў набыты калекцыянерам за 57,5 тысячы даляраў ЗША.
Сінай Кантар разам са сваёй жонкай Мірыям быў на «Тытаніку» сярод 285 пасажыраў другога класа. Пасля сутыкнення з айсбергам Мірыям пасадзілі ў лодку, і яна выратавалася. А вось Сінай загінуў, яго цела дасталі з ледзяной вады.
Пазней жонка змагла атрымаць знойдзеныя пры мужу рэчы. Яны ўключалі ў сябе гадзіннік, а таксама адзенне, пашпарт Расійскай імперыі, нататнік, грошы, кашалёк, кішэнны тэлескоп і штопар.
