Новы пікет ля польскага консульства — пад відам «незадаволеных палякаў» сагналі бюджэтнікаў і БРСМ. Вось хто на фота
Чарговая акцыя супраць закрыцця межаў прайшла каля Генконсульства Польшчы ў Гродне. БелТА піша, што арганізаваў пікет Саюз палякаў у Беларусі. Але ці былі там палякі? Разгледзелі фота.
Верхняе фота — 13 лютага, ніжняе — 24 лютага. Фота: БелТА
На калажы зверху — пажылыя людзі, што прыйшлі на акцыю, хутчэй за ўсё — з саюза ветэранаў або КПБ. Гэтым разам іх меней, чым на мінулым пікеце, але яны стаяць з абсалютна ідэнтычным плакатам у тым жа месцы.
Прыйшлі і бээрэсэмаўцы разам з прадстаўнікамі «Белай Русі» — гэтым разам іх меней і на першым плане іншыя людзі. На гэтым фота таксама сакратар гарадзенскага БРСМ Уладзіслаў Мандзік, а адразу за ім — штатная актывістка БРСМ Яна Мазавецкая. Яны былі і на пікеце 13 лютага, і на папярэдніх.
Фота: БелТА, СТБ
Астатнія ў шэрагу — таксама актывісты БРСМ і прафкамаў універсітэтаў, толькі менш медыйныя. Да прыкладу, у цэнтры калоны з чырвона-зялёным сцягам стаіць актывіст прафкама Гродзенскага дзяржаўнага ўніверсітэта 20-гадовы Андрэй Майстроў (на другім фота ён у сінім спартовым касцюме).
Фота: БелТА, «УКантакце»
Каля яго стаяў і з усіх сіл «не аддаваў Беларусь» ягоны «таварыш» па няшчасці Антон Вашкевіч.
Антон Вашкевіч. Фота: СБ і «УКантакце»
А вось кіраўніца гарадзенскай «Белай Русі» Святлана Вараніца з плакатам з мінулага пікета.
Мінулага разу актывісты «Белай Русі» таксама прыкрывалі твары. Фота: БелТА
Засвяцілася Ірына Галайда, старшыня камісіі па працы з моладдзю Савета ветэранаў Кастрычніцкага раёна горада Гродна. Яна часта ходзіць на такія пікеты.
Ірына Галайда сёння і 12 кастрычніка 2022 года. Фота: БелТА
Гэтыя дзве актывісткі «Белай Русі» на першым плане таксама былі на мінулым пікеце.
Верхняе фота — 13 лютага, ніжняе — 24 лютага. Фота: СБ і БелТА
Ад гродзенскага Саюза палякаў выступае адзін пажылы мужчына — 67-гадовы Казімір Знайдзінскі, які ўзначальвае гродзенскі філіял праўладнай часткі Саюза палякаў з 2007 года.
Фота: БелТА, «Сельская газета»
Знайдзінскі — некалі вядомы футбаліст і другі ў гісторыі арбітр ФІФА з Беларусі, які цяпер узначальвае Гродзенскую спартыўную дзіцяча-юнацкую школу алімпійскага рэзерву №1. Ягоная галоўная прэтэнзія — яму будзе больш складана ездзіць на могілкі да сваякоў.
Агулам гэтым разам пікет атрымаўся меншы па колькасці ўдзельнікаў. Невядома, колькі ў ім паўдзельнічала сапраўдных палякаў, але, калі меркаваць па фота з дзяржСМІ, гэта лічаныя людзі.
«Наша Нiва» — бастыён беларушчыны
ПАДТРЫМАЦЬПрывезлі нават бээрсээмаўца з Зэльвы. Хто пікетаваў учора пад польскім генконсульствам у Гродне
